بریسٹ کینسر خواتین کو شکار بنانے والے سرطان کی سب سے عام قسم ہے اور اس کے حوالے سے شعور اجاگر کرنے کے لیے ایک تصویر آن لائن وائرل ہوگئی ہے جس میں اس مرض کی متعدد علامات کو ظاہر کیا گیا ہے۔

یہ تصویر ورلڈ وائیڈ بریسٹ کینسر کی کورنی ایلس ورتھ بیومونٹ نے ڈیزائن کی ہے جس میں لیموں کو استعمال کرکے اس کینسر کی علامات کو مختلف شکلوں میں ظاہر کیا گیا ہے۔

بیشتر افراد کو علم ہے کہ جسم کے اس حصے میں گلٹی یا گومڑ کینسر کا خطرہ ظاہر کررہا ہوتا ہے مگر وہ اس جگہ کی ساخت اور حجم میں تبدیلیوں یہاں تک کہ جلد کا رنگ بدلنے کو اکثر نظرانداز کردیتے ہیں۔

یہ تصویر رواں ماہ فیس بک پر ایک کینسر کی شکار خاتون نے شیئر کی تھی جس نے انہیں اس کینسر کے حوالے سے جاننے میں مدد دیتی تھی۔

اس خاتون میں اس تصویر سے حاصل ہونے والی آگاہی کے بعد تشخیص میں معلوم ہوا کہ انہیں اسٹیج فور کا کینسر ہے۔

انہوں نے بتایا 'اگر خواتین کینسر کے خطرے کو جاننا چاہتی ہیں یا اس کے شکار خواتین کی مدد کرنا چاہتے ہیں تو اس طرح کی تصاویر شیئر کرنا چاہئے جو اس جان لیوا مرض سے لاعلم افراد کی زندگی بدل سکتی ہیں'۔

طبی ماہرین کا بھی کہنا ہے کہ خواتین کو ان علامات کے بارے میں جاننا بہت ضروری ہے اور کسی بھی غیرمعمولی تبدیلی پر فوری طور پر ڈاکٹر سے رجوع کرنا چاہئے۔

ان کے بقول خواتین اکثر ان علامات سے ناواقف ہوتی ہیں جو کینسر کا عندیہ گلٹی سے ہٹ کر ظاہر کرتی ہیں اور اس حوالے سے شعور اجاگر کرنے کی ضرورت ہے۔