لاہور: پاکستانی ماڈل و اداکارہ عروہ حسین اور گلوکار فرحان سعید رشتہ ازدواج میں منسلک ہوگئے۔

دونوں ستاروں کی نکاح کی تقریب لاہور کی بادشاہی مسجد میں ہوئی جس میں شوبز کی مشہور شخصیات سمیت دلہا دلہن کے اہل خانہ و عزیزواقارب نے شرکت کی۔

یاد رہے کہ گلوکار فرحان سعید اور اداکارہ عروہ حسین گزشتہ ماہ ہی 22 نومبر کو اپنی منگنی کا باقاعدہ اعلان کیا تھا۔

عروہ حسین کی بہن ماورا حسین نے فوٹو شیئرنگ ایپلی کیشن انسٹاگرام پر نکاح کی تقریب کی تصاویر اپلوڈ کرکے دونوں ستاروں کے پرستاروں کو اس اہم خبر سے آگاہ کیا۔

ماورا کی پہلی پوسٹ میں دلہن بنی عروہ کو گاڑی میں سوار ہوکر اپنی منزل پہ جاتے دیکھا جاسکتا ہے۔

ماورا کی پوسٹ کردہ دوسری تصویر میں ان کے ساتھ دولہا بنے گلوکار فرحان سعید بھی موجود ہیں۔

جس کے بعد ماورا نے اپنی بہن عروہ کے ساتھ جذباتی تصویر میں ان کے باقاعدہ نکاح کی خبر پرستاروں کو سنادی۔

سوشل میڈیا پر بھی دونوں اسٹارز کی تصاویر خوب گردش کرتی نظر آئیں۔

ہم ٹی وی کے ڈرامے 'اڈاری' اور اے آر وائے کے ڈرامے 'میرے اجنبی' کی مقبول جوڑی نے حال ہی میں اپنی منگنی کا اعلان کیا تھا۔

گلوکار فرحان سعید نے اپنی انسٹاگرام پوسٹ میں ایفل ٹاور کے سامنے موجود عروہ کی تصویر شائع کی تھی اور ساتھ لکھا تھا کہ ’اس نے ہاں کہہ دی‘۔

واضح رہے کہ عروہ اور فرحان اکثر و بیشتر مختلف ایونٹس اور ایوارڈ شوز میں ایک ساتھ شرکت کرتے ہیں، جہاں ان کی جوڑی کو خوب سراہا جاتا ہے۔