اسلام آباد: وفاقی دارالحکومت اسلام آباد میں دو گروپوں کے درمیان تصادم کے نتیجے میں سابق چیئرمین سینیٹ محمد میاں سومرو کا بھانجا ملک فہد ہلاک اور ایک شخص زخمی ہوگیا۔

پولیس حکام کے مطابق رات گئے اسلام اباد کے سیکٹر ایف 10 میں راجہ ارشد اور ملک طارق کے گروپوں کے درمیان لڑکی کے معاملے پر تنازع کے بعد تصادم ہوا اور بات تھانے تک جا پہنچی جہاں پر پولیس نے دونوں گروپوں کے درمیان صلح کروا دی۔

بعدازاں اسلام آباد کے سیکٹر ایف 10 میں ملک طارق اور راجہ ارشد کے گروپوں میں دوبارہ تصادم ہوا۔

پولیس کا کہنا ہے کہ راجہ ارشد گروپ کی فائرنگ سے ملک طارق زخمی ہوا جبکہ اس جھگڑے میں صلح کے لیے کوشش کرنے والے سابق چیئرمین سینیٹ میاں محمد سومرو کے بھانجے ملک فہد کو گولیاں لگیں، جس سے وہ موقع پر ہی ہلاک ہوگئے۔

ڈان نیوز کو موصول ابتدائی پوسٹ مارٹم رپورٹ کے مطابق فہد ملک کو چار گولیاں لگیں۔

پولیس حکام کے مطابق ابھی تک کسی نے قانونی کارروائی کے لیے کوئی درخواست نہیں دی، جبکہ ملک فہد کی لاش سرد خانے میں موجود ہے جو ان کے بھائی کے لندن سے واپس آنے کے بعد ان کے حوالے کی جائے گی۔

دوسری جانب ایف 10 فائرنگ کیس میں ملزمان کی گرفتاری میں غفلت برتنے پر ایس ایچ او ذوالفقار علی کو معطل کردیا گیا۔

سینئر سپرنٹنڈنٹ پولیس (ایس ایس پی) اسلام آباد نے ایس ایچ او شالیمار ذوالفقار علی کو 15 رپورٹ کرنے کا حکم دیا جبکہ اینٹی کارلفٹنگ سیل کے انسپکٹر فیاض رانجھا کو ایس ایچ او شالیمار تعینات کردیا گیا۔