لندن: متحدہ قومی موومنٹ کے مقتول رہنما عمران فاروق کے قتل کی تحقیقات کے سلسلے میں ایک اہم پیش رفت ہوئی ہے جہاں لندن میٹرو پولیٹن پولیس نے ایک شخص کو گرفتار کر لیا ہے۔

میٹروپولٹن پولیس نے عمران فاروق قتل کیس کے سلسلے میں ایک شخص کی گرفتاری کی تصدیق کرتے ہوئے اسے کیس کے لیے ایک اہم پیش رفت قرار دیا ہے۔

پولیس کے مطابق 52 سالہ شخص کو صبح ہیتھرو ایئرپورٹ سے گرفتار کیا گیا جسے لندن کے پولیس اسٹیشن لے جایا گیا ہے۔

پولیس کے مطابق گرفتار کیا گیا شخص آج ہی کینیڈا سے برطانیہ پہنچا تھا جبکہ مذکورہ شخص پاکستانی نژار برطانوی شخص ہے۔

یاد رہے کہ ایم کیو ایم کے رہنما کو سولہ ستمبر دو ہزار دس کو لندن میں ان کے گھر کے باہر قتل کر دیا گیا تھا اور اس کے بعد اس سلسلے میں مسلسل تحقیقات جاری ہیں۔

اس سے پہلے میٹرو پولیٹن پولیس نے لندن کے شمالی لندن کے ایک علاقے میں دو گھروں کی تلاشی لی تھی جو 55 گھنٹے جاری رہی۔

پولیس گرفتار شخص کا نام بتانے سے گریز کر رہی ہے تاہم حکام کو شک ہے کہ قتل کی اس سازش میں آٹھ سے دس افراد ملوث ہو سکتے ہیں اور اس سلسلے میں جلد مزید گرفتاریاں عمل میں لائی جائیں گی۔

عمران فاروق متحدہ قومی موومنٹ کے بانی رہنماؤں میں سے ایک تھے اور 1999 سے انہوں نے خود ساختہ جلاوطنی اختیار کی ہوئی تھی۔