دمشق: شام میں اتوار کو دو شہروں میں ہونے والے بم دھماکوں کے نتیجے میں کم از کم 87 افراد ہلاک جبکہ درجنوں زخمی ہو گئے۔

خبر رساں ادارے اے ایف پی کے مطابق پہلا واقعہ شام کے اہم شہر حمص میں پیش آیا جہاں دو کار بم دھماکوں میں کم از کم 57 افراد ہلاک ہوئے۔

انسانی حقوق کے حوالے سے شامی مبصر گروپ نے اس سے قبل ہلاکتوں کی تعداد 46 بتائی تھی۔

دوسری جانب شامی دارالحکومت دمشق کے جنوب میں خودکش حملوں سمیت پرتشدد کارروائیوں میں اب تک کم از کم 30 افراد ہلاک ہوئے۔

شام کے سرکاری براڈکاسٹر کے مطابق حضرت زینبؓ کے مزار کے قریب ایک کار بم دھماکے اور دو خودکش حملوں کے نتیجے میں 30 افراد ہلاک اور درجنوں زخمی ہوئے۔

سرکاری براڈکاسٹر نے بتایا کہ حملے اس وقت ہوئے جب ایک اسکول سے طالب علم نکل رہے تھے جن میں سے متعدد ہلاک ہوگئے۔

مبصر گروپ کے مطابق ایک کار بم اور دو خودکش حملے ہوئے جبکہ چوتھے دھماکے کی نوعیت معلوم نہیں ہوسکی۔