منگل کو پاکستانی کی قومی ایئر لائن (پی آئی اے) کے ملازمین نے ائیر لائن کی نجکاری کے خلاف کراچی میں کارگو ٹرمینل سے جناح انٹرنیشنل ایئر پورٹ کی جانب مارچ کی تاہم سکیورٹی فورسز نے انھیں ایئر پورٹ سے پہلے ہی روک لیا۔

ہڑتال میں فائرنگ کے نتیجے میں زخمی ہونے والے پی آئی اے کے دو ملازمین زخموں کی تاب نہ لاتے ہوئے ہلاک ہوگئے۔

پی آئی اے کی جوائنٹ ایکشن کمیٹی کی جانب سے ہڑتال کی کال پر پی آئی اے ملازمین نے فضائی آپریشنز بند کرنے کا اعلان کیا تھا۔

جوائنٹ ایکشن کمیٹی کی اس ہڑتال میں انجینیئرنگ ڈپارٹمنٹ بھی شامل ہے جس کے باعث جہازوں کا شیڈول متاثر ہونے کا امکان بڑھ گیا ہے۔

یاد رہے کہ پیر کو پی آئی اے کے ملازمین کی جوائنٹ ایکشن کمیٹی نے حکومت کو مطالبات کے حل کے لیے ایک ہفتے کی مہلت دی تھی، دوسری جانب حکومت نے اسٹریٹیجک پارٹنرشپ کا فیصلہ چھ ماہ کے لیے موخر کر دیا جبکہ نجکاری کا فیصلہ برقرار رکھا، جس کے خلاف ملک بھر میں پی آئی اے کے دفاتر میں احتجاج جاری رہا.