کوئٹہ: بلوچستان کے دارالحکومت کوئٹہ اور ساحلی شہر گوادر کو 'محفوظ شہر' بنانے کے لیے سیکیورٹی کا جامع منصوبہ تشکیل دے دیا گیا۔

مذکورہ منصوبے کا تخمینہ 10 ارب روپے لگایا گیا ہے اور اس منصوبے پر عمل درآمد کے لیے صوبائی حکومت پہلے ہی سے 3 ارب روپے کی منظوری دے چکی ہے۔

خیال رہے کہ اس منصوبے کی تفصیلات ایک اجلاس کے دوران بتائی گئیں جس کی صدارت بلوچستان کے چیف سیکریٹری سیف اللہ چھٹہ کررہے تھے۔

اجلاس کے دوران بریفنگ دیتے ہوئے انفارمیشن ٹیکنالوجی کے ڈائریکٹر جنرل (ڈی جی) خالد شیر دل کا کہنا تھا کہ دونوں شہروں میں لیزر کیمروں، آٹومیٹک نمبر پلیٹ ریڈر اور آر ایف آئی ڈی سیکیورٹی آلات کی تنصیب کے لیے 10 ارب روپے مختص کیے گئے ہیں۔

انھوں ںے مزید کہا کہ اس منصوبے پر عمل درآمد کرنے کی غرض سے آلات اور سسٹم کی خریداری کے لیے 3 ارب روپے کی منظوری دی جاچکی ہے۔

ڈی جی کا کہنا تھا کہ کوئٹہ کے تمام اہم مقامات پر 1400 سیکیورٹی اور نگرانی کیمرے نصب کیے جائیں گے، جس میں شہر کے داخلی اور خارجی راستے بھی شامل ہیں جبکہ گوادر اور اس کے اطراف میں 136 مقامات پر 465 کیمرے نصب کیے جائیں گے۔

خالد شیر دل کا کہنا تھا کہ سیکیورٹی کے اضافی انتظامات کرتے ہوئے وائرلیس ٹاور بھی نصب کیے جائیں گے۔

یہ خبر 28 جنوری 2016 کو ڈان اخبار میں شائع ہوئی

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔