صوابی: خیبر پختونخوا کے ضلع صوابی میں پولیس نے سرچ آپریشن کے دوران مقابلے میں 4 مبینہ دہشت گردوں کو ہلاک کرنے کا دعویٰ کیا ہے.

ڈسٹرکٹ پولیس آفیسر (ڈی پی او) صوابی جاوید اقبال وزیر کے مطابق صوابی کے پہاڑی علاقے اجمیر میں دہشت گردوں کی موجودگی کی اطلاع پر سرچ آپریشن کیا گیا۔

سرچ آپریشن کے دوران پہاڑی میں موجود مبینہ شدت پسندوں نے پولیس پر بھاری ہتھیاروں سے حملہ کردیا۔

دہشت گردوں کے حملے کے جواب میں پولیس نے بھی فائرنگ کی جس کے نتیجے میں 4 مبینہ دہشت گرد مارے گئے جبکہ کئی فرار ہوگئے.

جاوید اقبال وزیر کا کہنا تھا کہ سرچ آپریشن کے دوران 25 سے زائد مشتبہ افراد کو حراست میں بھی لیا گیا جن کے قبضے سے 2 دستی بم، ایک کلاشنکوف اور 3 پستول برآمد ہوئے.

پولیس نے گھنٹوں تک جاری رہنے والا سرچ آپریشن مکمل کرکے علاقے کو کلیئر قرار دے دیا.