مکہ: سعودی عرب نے کہا ہے کہ حج کے دوران بھگدڑ مچنے سے جاں بحق ہونے والوں کی تعداد 769 ہو گئی۔

سعودی وزیر برائے صحت خالد الفالح نے صحافیوں کو بتایا کہ حادثے میں زخمی ہونے والوں کی تعداد بھی 934 تک پہنچ گئی ہے۔

سعودی حکام کے مطابق، جمعرات کو رمی کے دوران ہونے والی بھگدڑ میں ابتدائی اموات کی تعداد 717 جبکہ 863 زخمی تھے۔

ابھی تک جاں بحق ہونے والے حاجیوں کا شناختی عمل جاری ہے ، تاہم کئی ملکوں نے سانحے میں اپنے شہریوں کی ہلاکتوں کی تعداد کا اعلان کردیا ہے۔

پاکستان نے حادثہ میں جاں بحق ہونے والے اپنے نو حاجیوں کے نام جاری کر دیے۔

ریڈیو پاکستان کی ایک رپورٹ کے مطابق جاں بحق ہونے والوں میں حفصہ شعیب، زرین نسیم، سیدہ نرجس شہناز، بی بی زینب، محمود ارشد، رشیداں بی بی، زاہد گل، ڈاکٹر امیر علی لاشاری اور مخدوم زادہ سید اسد مرتضیٰ گیلانی شامل ہیں۔

رپورٹ کے مطابق حادثے میں 17 پاکستانی زخمی ہوئے جن میں سے 10 کو طبی امداد کے بعد ہسپتال سے فارغ کردیا گیا، جبکہ دیگر زخمی منیٰ الوادی اور منیٰ ڈسپنسری نمبر 5 میں زیرِ علاج ہیں۔

گذشتہ روز دفتر خارجہ سے جاری ہونے والے بیان میں کہا گیا تھا کہ سانحے کے بعد لاپتہ پاکستانیوں کی تلاش کے لیے ہر ممکن اقدامات کیے جارہے ہیں تاہم ضروری نہیں کہ حجاج کے لاپتہ ہونے کا تعلق سانحے سے ہو۔

ترجمان دفتر خارجہ کے مطابق اکثر حجاج دوران حج اپنے خاندانوں سے الگ ہوجاتے ہیں اور بعد میں مل جاتے ہیں۔

بیان میں مزید کہا گیا کہ اب تک ایسے 86 لاپتہ افراد اپنے خاندانوں سے دوبارہ مل چکے ہیں جبکہ دیگر کی تلاش کا کام جاری ہے۔

ترجمان کے مطابق ’ہم باقی لاپتہ افراد کے تحفظ کی دعا کرتے ہیں اور توقع کرتے ہیں کہ وہ جلد مل جائیں گے‘۔