کیا آپ کو معلوم ہے کہ روزانہ کتنے گلاس پانی پینا صحت کے لیے ٹھیک رہتا ہے ؟ یقیناً بیشتر افراد کے ذہنوں میں 8 کا ہندسہ گونجا ہوگا جو کہ ہمارے ذہنوں میں برسوں سے روزانہ پانی کے استعمال کی مثالی مقدار کی شکل میں چپک چکا ہے۔

مگر حقیقت تو یہ ہے کہ روزانہ کتنا پانی پینا چاہئے اس کا انحصار فرد پر ہوتا ہے۔

یہ بات امریکا میں ہونے والی ایک طبی تحقیق میں سامنے آئی ہے۔

کنیکٹیکٹ یونیورسٹی کی تحقیق میں بتایا گیا ہے کہ جسم میں پانی کی ضرورت ہر فرد میں مختلف ہوتی ہے، جس کے لیے ماحولیاتی صورتحال، گرمی، ورزش یا کام کی شدت، عمر اور غذا جیسے عناصر کو سامنے رکھا جاتا ہے۔

تحقیق میں بتایا گیا ہے کہ بنیادی طور پر پانی کی مقدار کے استعمال کا انحصار آپ کی پیاس پر ہے۔

اس کے علاوہ جسم میں پانی کی کمی کے بارے میں پیشاب کی رنگت سے بھی اندازہ لگایا جاسکتا ہے اگر وہ گہری زرد رنگت کا ہو تو آپ کو ایک گلاس پانی پی لینا چاہئے۔

تحقیق کے مطابق پانی کی کمی خطرناک ہوتی ہے مگر حد سے زیادہ پانی بھی صحت کے لیے تباہ کن ثابت ہوتا ہے۔

ایتھلیٹس پر ہونے والی ایک تحقیق کے مطابق پانی کی زیادتی سے جسم میں ہارمونز کا توازن بگڑ سکتا ہے جس کے نتیجے میں قے، سر درد، سر چکرانا اور انتہائی سنگین نوعیت ہونے پر کوما اور موت تک کا بھی خطرہ ہوتا ہے۔