ڈیرہ اسمٰعیل خان: وفاق کے زیر انتظام قبائیلی علاقے جنوبی وزیرستان میں پاک فوج کی فضائی کارروائی میں مبینہ دہشت گردوں اور شہریوں سمیت 22 افراد ہلاک اور متعدد زخمی ہوگئے ہیں۔

ذرائع کے مطابق پاک فوج کے ہیلی کاپٹروں نے تحصیل سروکئی میں کنڈی گھر، زیارت زئے اور درماندی کے علاقوں میں دہشت گردوں کے ٹھکانوں کو نشانہ بنایا۔

ذرائع کا کہنا ہے کہ کنڈی گھر میں محسود طالبان (خان گروپ) کے کیمپ پر حملے میں 13 دہشت گرد ہلاک اور دیگر 8 زخمی ہوئے۔

مقامی افراد نے ڈان کو بتایا ہے کہ زیارت زئے کے علاقے میں مبینہ دہشت گرد عبدالمنان محسود کے گھر کو نشانہ بنایا گیا، جس کے نتیجے میں 3 خواتین، 4 لڑکیاں اور 2 لڑکے ہلاک ہوگئے۔

ایک گھر کو درماندی کے علاقے میں بھی فضائی کارروائی میں نشانہ بنایا گیا، جس میں دو کم سن بچے زخمی ہوگئے۔

اس حملے میں زخمی ہونے والے ایک بچے کو طبی امداد کے لئے ڈیرہ اسمٰعیل خان کے ڈسٹرکٹ ہیڈ کوارٹر ہسپتال منتقل کیا گیا جبکہ دوسرے زخمی بچے کو ٹانک کے ڈسٹرکٹ ہیڈ کوارٹر ہسپتال منتقل کیا گیا۔

مزید پڑھیں: جنوبی وزیرستان میں ڈرون حملہ، 6 'دہشتگرد' ہلاک

جمعیت علماء اسلام ف کے ممبر قومی اسمبلی جماالدین نے شہریوں کی ہلاکت پر فضائی کارروائی کی شدید مذمت کرتے ہوئے کہا ہے کہ حملے میں معصوم شہری ہلاک و زخمی ہوئے ہیں۔

اس سے قبل میڈیا میں آنے والی رپورٹ کے مطابق جنوبی وزیرستان میں امریکی ڈرون کے میزائل حملے میں 6 مبینہ دہشت گرد ہلاک ہوئے تاہم اس ڈرون حملے کی تصدیق نہیں ہوسکی ہے۔