اسلام آباد: سابق صدر پرویز مشرف کے بیان پر قائد حزب اختلاف خورشید شاہ نے ردعمل دیتے ہوئے کہا ہے کہ پاکستان پیپلز پارٹی کے شریک چیئرمین آصف زرداری نے کوئی جرم ثابت ہوئے بغیر گیارہ سال جیل میں گزارے، پرویز مشرف آدھا دن بھی اتنی مشکلات برداشت کرکے دکھائیں۔

گزشتہ روز ایک انٹرویو کے دوران پرویز مشرف نے دعویٰ کیا تھا کہ آصف علی زرداری پر جیل میں کبھی تشدد نہیں کیا گیا اور انہوں نے جیل کا اپنا زیادہ وقت کراچی کے ایک ہسپتال میں گزارا۔

انٹرویو میں آرمی چیف جنرل راحیل شریف کی مدت ملازمت میں توسیع کی تجویز پیش کرتے ہوئے انہوں نے خبردار کیا کہ فوجی سربراہ کی تبدیلی سے 'سب کچھ رائیگاں چلا جائے گا'۔

قائد حزب اختلاف خورشید شاہ کا کہنا ہے کہ عدالت سے فرار ہونے والے پرویز مشرف کو آصف زرداری کے خلاف بیان دینا زیب نہیں دیتا۔

انہوں نے کہا کہ پرویز مشرف نے اپنے ڈرائیور کو اسپتال کے لیے گاڑی بھگانے کا بزدلانہ اقدام اٹھایا تھا۔

خورشید شاہ نے کہا ہے کہ آصف زرداری نے کوئی جرم ثابت ہوئے بغیر گیارہ سال جیل میں گزارے، آصف زرداری پر دوران حراست تشدد کیا گیا اور زبان کاٹی گئی۔

قائد حزب اختلاف کے مطابق آصف زرداری کو ایک دہائی تک اپنے خاندان اور بچوں سے ملنے نہیں دیا گیا، زرداری کے خلاف بیان دینے کے بجائے پرویز مشرف آدھا دن بھی اتنی مشکلات برداشت کرکے دکھائیں۔