پانچ مرتبہ کے عالمی چیمپیئن فلائیڈ مے ویدر سے ورلڈ باکسنگ چیمپیئن شپ کی بیلٹ واپس لے لی گئی ہے جو انہوں نے مئی میں فلپائنی حریف مینی پکاؤ کو شکست دے کر جیتی تھی۔

مے ویدر کو ورلڈ باکسنگ آرگنائزیشن کو تین جولائی تک دو لاکھ ڈالر کی رقم ادا کرنا تھی لیکن وہ ایسا کرنے میں ناکام رہے۔

توقع کی جا رہی ہے کہ مے ویدر اب ورلڈ باکسنگ آرگنائزیشن کا ٹائٹل چھوڑ دیں گے جیسا کہ انہوں نے پکاؤ سے میچ میں فتح کے بعد اعلان بھی کیا تھا۔

مے ویدر نے پکاؤ کو شکست دینے کے بعد کہا تھا کہ وہ اپنے تمام ٹائٹل چھوڑ کر نوجوانوں کو بیلٹ جیتنے کا موقع فراہم کریں گے۔

مے ویدر اور پکاؤ کے درمیان 40 کروڑ ڈالر سے زیادہ کا بزنسک رنے والی فائٹ کو کھیلوں کی دنیا کا سب سے مہنگا مقابلہ قرار دیا گیا تھا۔

اب ان کے ساتھی امریکی باکسر ٹموتھی بریڈلی اس بیلٹ کے مالک بن جائیں گے۔

ورلڈ باکسنگ آرگنائزیشن نے اس صورتحال میں اپنے ویب سائٹ پر جاری بیان میں کہا ہے کہ ورلڈ باکسنگ چیمپیئن شپ کمیٹی کے پاس اس کے سوا کوئی چارہ نہیں کہ وہ مے ویدر جونیئر سے ڈبلیو بی او ویلٹر ویٹ چیمپیئن کا اعزاز واپس لے لے۔

مے ویدر کے پاس ورلڈ باکسنگ آرگنائزیشن کے خلاف اپیل کرنے کیلئے 20 جولائی تک کا وقت ہے۔