کوئٹہ: صوبہ بلوچستان کے دارالحکومت کوئٹہ سے تافتان جانے والی زائرین کی بس پر سیٹلائٹ ٹاؤن کے علاقے میں فائرنگ کے نتیجے میں 2 افراد ہلاک جبکہ ایک شخص زخمی ہوگیا۔

نمائندہ ڈان نیوز کے مطابق پیر کو کوئٹہ میں سیٹلائٹ ٹاؤن کے علاقے چاندنی چوک میں نامعلوم ملزمان نے زائرین کی ایک بس پر فائرنگ کردی، جس کے نتیجے میں 2 افراد ہلاک ہوگئے۔

ریسکیو ذرائع کے مطابق واقعے میں ایک شخص زخمی ہوا، جسے سول ہسپتال کوئٹہ منتقل کردیا گیا۔

واقعے کے بعد ملزمان جائے وقوع سے فرار ہونے میں کامیاب ہوگئے جبکہ پولیس اور بلوچستان کانسٹیبلری کی بھاری نفری موقع پر پہنچ گئی اور شواہد اکھٹے کر کے تفتیش کا آغاز کردیا گیا۔

یاد رہے کہ اس سے قبل بھی اس علاقے میں زائرین کی بسوں پرخود کش حملوں اور فائرنگ کے واقعات پیش آتے رہے ہیں۔

وزیراعظم کی مذمت

وزیراعظم نواز شریف نے کوئٹہ میں زائرین کی بس پر فائرنگ کے واقعے کی شدید الفاظ میں مذمت کرتے ہوئے رپورٹ طلب کرلی ہے۔

انھوں نے متاثرہ خاندانوں سے اظہارِ یکجہتی کرتے ہوئے انتظامیہ کو زخمیوں کو بہترین طبی سہولیات فراہم کرنے کی ہدایت کردی۔

وزیراعظم نے ملک سے دہشت گردی اور شدت پسندی کے خاتمے کے عزم کا بھی اعادہ کیا۔