راولپنڈی کی مقامی عدالت نے شراب برآمدگی کیس میں معروف اداکارہ عتیقہ اوڈھو کو بری کردیا۔

کسٹم حکام کے مطابق چار سال قبل سنہ 2011 میں اسلام آباد کے بینظیر بھٹو انٹرنیشل ائیرپورٹ پر عتیقہ اوڈھو کے سامان کی تلاشی کے دوران اس وقت شراب کی دو بوتلیں برآمد ہوئیں تھیں جب وہ قومی آئرلائن کی پرواز سے کراچی جارہی تھیں۔

شراب برآمد ہونے پر عتیقہ اوڈھو کے خلاف چارسال قبل اسلام آباد ائیرپورٹ سے شراب لے جانے پر مقدمہ درج کیا گیا تھا۔

اس واقعے کا سابق چیف جسٹس افتخار چوہدری نے ازخود نوٹس لیا تھا جس کے بعد اس کیس کی سماعت راولپنڈی کی سول کورٹ میں کی گئی۔

چار سال بعد کارروائی مکمل ہونے کے بعد آج عدالت نے عتیقہ اوڈھو کو مقدمے سے بری کردیا۔