کراچی: الیکشن کمیشن آف پاکستان نے کراچی کے حلقے این اے 246 میں ضمنی انتخاب میں حصہ لینے والے امیدواروں کی حتمی فہرست جاری کردی ہے۔

قومی اسمبلی کی یہ نشست سینئر سیاست دان نبیل گبول کے استعفے کے بعد خالی ہوئی تھی، جنھوں نے گزشتہ ماہ اسمبلی رکنیت سے استعفیٰ دے دیا تھا۔

الیکشن کمیشن کی جانب سے جاری کی گئی فہرست کے مطابق این اے 246 سے ضمنی انتخاب میں حصہ لینے والے حتمی امیدوار یہ ہیں۔

• متحدہ قومی موومنٹ (ایم کیو ایم) کے کنور نوید

• پاکستان تحریک انصاف (پی ٹی آئی) کے عمران اسماعیل

• جماعت اسلامی کے راشد نسیم

• پاسبان کے عثمان معظم

• جبکہ 11 آزاد امیدوار بھی ضمنی انتخاب میں حصہ لیں گے ۔

الیکشن کمیشن کے مطابق این اے 246 میں پولنگ 23 اپریل کو صبح 9 سے شام 5 بجے تک ہوگی۔

یاد رہے کہ اس نشت سے مستعفی ہونے والے نبیل گبول مارچ 2013 میں 25 سال تک پاکستان پیپلز پارٹی سے وابستہ رہنے کے بعد ایم کیو ایم میں شامل ہوئے تھے۔

تحریک انصاف نے 19 اپریل کو عزیزآباد کے جناح گراؤنڈ میں جلسے کا اعلان بھی کر رکھا ہے تاہم دو روز قبل جلسے کے انتظامات کا معائنہ کرنے کے لیے جانے والے پی ٹی آئی قافلے کو مشتعل افراد کے حملے کا سامنا بھی کرنا پڑا۔

یہ بھی پڑھیں: عزیز آباد میں تحریک انصاف کے قافلے پر حملہ، مقدمہ درج

بعد ازاں گورنرسندھ ڈاکٹر عشرت العباد سے ملاقات کے بعد ایم کیو ایم اور پی ٹی آئی میں عزیزآباد جلسے کا معاملہ طے پاگیا، جس کے تحت پی ٹی آئی جناح گراؤنڈ میں 'یادگارِ شہداء' کے تقدس کا خیال رکھے گی۔