لندن: یہاں کی ایک عدالت نے ایک گونگی بہری لڑکی کو برطانیہ اسمگل کرنے اور تقریباً ایک دہائی تک غلام بنائے رکھنے کے جرم پر پاکستانی میاں بیوی کو ایک لاکھ ساٹھ ہزار ڈالرز جرمانہ ادا کرنا ہوگا۔

پاکستان سے دس سال کی عمر میں اسمگل کی جانے والی لڑکی کو 85 برس ے الیاس اشعر نے متعدد بار جنسی زیادتی کا نشانہ بھی بنایا گیا، جو اپنی 69 برس کی بیوی طلعت کے ساتھ اس لڑکی کو اپنی خدمت کرنے پر بھی مجبور کرتا تھا۔

تفتیش کاروں نے اس لڑکی کو ان دونوں کے پانچ کمروں کے مکان کے تہہ خانے میں ایک پلنگ پر سوتے ہوئے دریافت کیا تھا۔ یہ تفتیش کار منی لانڈرنگ کے الزامات کی تحقیقات کررہے تھے۔

اب وہ بیس برس کی ہے، اس نے گزشتہ سال مقدمہ میں گواہی دینے کے لیے اشاروں کی زبان سیکھی تھی۔

سالفورڈ کے چیف سپریٹنڈنٹ میری ڈوئل نے کہا کہ یہ رقم اس لڑکی کی زندگی کے ان قیمتی برسوں کو واپس تو نہیں لاسکے گی جو اس خوفناک صورتحال میں گزرے تھے، تاہم اس کو اپنی زندگی کو آگے بڑھانے میں مدد کریں گے۔

انہوں نے کہا ’’مجھے یقین ہے کہ آج کا یہ فیصلہ انسانی اسمگلنگ کے کسی بھی متاثرہ فرد کو امید کی ایک کرن دے گا۔‘‘

یاد رہے کہ گزشتہ سال برطانیہ کی ایک عدالت نے 84 سالہ الیاس اشعر کو 13 برس قیدکی سزا اور اس کی بیوی طلعت اشعر کو پانچ برس قید کی سزا سنائی تھی۔

جبکہ اس عمر رسیدہ جوڑے کی 46 سالہ بیٹی فائزہ کو 300 گھنٹے کی’کمیونٹی سروس‘ کی سزا دی گئی تھی۔

برطانوی حکام نے اس 20 سالہ لڑکی کو 2009ء میں بازیاب کرایا تھا۔

اس وقت الیاس اشعر کو ریپ کے 13 الزامات کا بھی مجرم قرار دیا گیا تھا، الیاس اور ان کی اڑسٹھ سالہ بیگم طلعت کو اس سے قبل انسانی سمگلنگ اور مراعات کے فراڈ میں مجرم قرار دیا جا چکا ہے۔

معذور لڑکی کا نام قانونی وجوہات کی وجہ سے ظاہر نہیں کیا گیا تھا۔

بدھ کے روز عدالت نے انہیں حکم دیا کہ وہ لڑکی کو ایک لاکھ ساٹھ ہزار ڈالرز ادا کریں بصورت دیگر انہیں مزید دو سال قید کی سزا کاٹنا ہوگی۔

اس کے علاوہ مانچسٹر کراوٴن کورٹ نے ان دونوں میاں بیوی کو یہ حکم بھی دیا ہے کہ وہ جعلی کلیم پر حاصل کی گئی 42 ہزار پونڈ کی امدادی رقم بھی واپس کرے۔ مزید یہ کہ انہیں ملکی اخراجات تین لاکھ 21 ہزار پونڈ بھی ادا کرنے کا حکم دیا گیا ہے۔