عالمی شہرت یافتہ ارجنٹائن کے فٹبالر اور یونیسیف کے سفیر لائنیل میسی نے جمعہ کو غزہ میں بچوں کی ہلاکتوں پر افسوس کا اظہار کیا ہے اور خطے میں بلا جواز تشدد کے خاتمے پر زور دیا ہے۔

فیس بک پیج پر اپنے پیغام میں میسی کا کہنا تھا کہ ” ایک باپ اور یونیسیف کا سفیر ہونے کے ناطے اسرائیل اور فلسطین کے درمیان تنازعے میں آنے والی فلسطینی بچوں کی تصاویر دیکھ کر سخت افسردہ اور حیرت زدہ ہوں، جہاں تشدد سے کئی نوجواں اپنی زندگیاں کھو چکے ہیں، اور لاتعداد بچے زخمی ہو گئے ہیں۔

میسی نے کہا کہ بچوں نے یہ تنازعہ پیدا نہیں کیا لیکن وہ اس کی بھاری قیمت ادا کر رہے ہیں۔

انہوں نے کہا کہ ہمیں فوجی تنازعے کے نتائج پر غور کرنا چاہیے اور بچوٓں کے تحفظ کو یقینی بنانا چاہیے۔

اس بلا جواز تشدد کے سائیکل کو روکنا ضروری ہے۔

اقوام متحدہ کے مطابق 8 جولائی سے شروع ہونے والی لڑائی میں 447 بچوں سمیت 1,354 فلسطینی ہلاک ہوئے ہیں۔

اگست 2013 میں میسی نے ایف سی بارسلونا کے ہمراہ اسرائیل کا دو روزہ امن دورہ کیا تھا۔

میسی نے فلسطینی صدر محمود عباس سے ملاقات کی اور ہیبرون میں فلسطینی نوجوانوں کو کوچ کیا۔

انہوں نے تل ابیب میں بچوں کو کوچنگ سے پہلے اسرائیلی صدر شمعون پیریز سے بھی ملاقات کی۔

ٹریننگ سیشن پریس سینٹر فار پیس اور اسرائیلی اور فلسطینی فٹ بال فیدریشن کی طرف سے منعقد کیا گیا تھا۔