ہماری لوک رومانوی داستانوں کی کوئی کس طرح تصویر کشی کرسکتا ہے جب تک کہ اسے ان تمام کہانیوں کے دلچسپ رنگوں کا علم نہ ہو؟

یہاں رنگوں سے مراد ان سب داستانوں کے ثقافتی اورسماجی پہلو ہیں۔

زیبن زوبی نے برصغیر کے رومانوی قصّوں کوان کی بھرپور رنگا رنگی کے ساتھ ایک تصویری نمائش، جو کراچی کی مجموعہ آرٹ گیلری میں جاری ہے، میں دکھانے کی کوشش کی ہے۔

یہ کوشش کس حد تک کامیاب ہے اس کا فیصلہ تو فن کے قدردان ہی کرپائیں گے۔

لیکن یہ بات طے ہے کہ نمائش کو دیکھ کر 'ہیر رانجھا' اور 'عمر ماروی' جیسی لازوال کہانیاں دیکھنے والے کو اس دور میں لے جاتی ہیں جب محبّت اپنی تمام تر سادہ دلی کے ساتھ زندہ تھی۔

زوبی نے جس طرح اپنی پینٹنگز میں شوخ اور کسی حد تک بھڑکیلے رنگوں کا استعمال کیا ہے اس سے یہ بات تو واضح ہوتی ہے کہ وہ اس خطے کے لوک کلچر سے بخوبی واقف ہیں۔

یہی نہیں، انہوں نے رانجھا کی بانسری اور ماروی کی لمبی گھنی زلفوں کے ذریعے ان رومانوی کہانیوں کے جمالیاتی زاویوں کو بھی ہاتھ سے جانے نہیں دیا ہے۔

جس کی وجہ سے تصویروں میں ایک ایسی سچائی دکھائی دیتی ہے جو ایک آرٹسٹ ہی کا خاصا ہے۔

یہ نمائش دو ہفتے تک جاری رہے گی۔