علامہ طاہرالقادری حکومتی وفد سے مذاکرات کے بعد معاہدے کا اعلان کر رہے ہیں، چوہدری شجاعت، مخدوم امین فہیم اور فاروق نائیک بھی ہمراہ ہیں۔۔۔۔۔۔۔فوؕٹو رائٹر

اسلام آباد: تحریک منہاج القرآن کے سربراہ ڈاکٹر طاہرالقادری پچھلے چار دنوں سے ملک کے حکمرانوں کو یزید اور دھرنے کے شرکاء کا حسینی قافلہ قرار دے رہے تھے، بالآخر اُن کو انہی حکمرانوں کے ساتھ معاہدہ کرنے پر مجبور ہونا پڑا۔

اب اس بات کو دلچسپ کہا جائے گا یا افسوسناک کہ دو روز قبل جب ان کے خطاب کے دوران سپریم کورٹ کے ایک فیصلے کی خبر آئی تھی، جس میں وزیراعظم پاکستان راجہ پرویز اشرف کو ایک جاری کیس کی سماعت کے دوران گرفتار کرنے کا حکم جاری کیا تھا تو انہوں نے فرمایا تھا کہ نصف کامیابی ہوگئی ہے اور اب نصف رہ گئی۔ لیکن کل دنیا نے دیکھا کہ حکومت کی جانب سے قادری کے پاس جانے والے مذاکراتی وفد کے ساتھ ان کے معاہدے پر اُسی وزیراعظم نے ہی دستخط کیے۔ گویا کہ خود کو حسینی مشن کا علمبردار اور حکمرانوں کو یزید کے پیروکار قراردینے کے بعد انہوں نے انہی یزیدی حکمرانوں سے بیعت ہی کر ڈالی۔ حالانکہ ایک دن پہلے تک تو وہ وارننگ دے رہے تھے کہ ناصرف اسمبلیاں تحلیل کردی جائیں بلکہ حکمران استعفے دیں تب ہی وہ دھرنا ختم کریں گے۔لیکن نہ تو اسمبلیاں تحلیل ہوئیں اور نہ موجودہ حکمران رخصت ہوئے اور ایک وقت ایسا آیا کہ قادری کے پاس ان ہی لوگوں سے مذاکرات کا راستہ ہی باقی نہیں رہا جن کو وہ گزشتہ تیئس دسمبر دوہزار بارہ سے مسلسل چور اور ڈاکو قرار دے رہے تھے۔

قادری کے اس میگا ایونٹ کا اسپانسر کون تھا اور کس نے اس سے حقیقی معنوں میں فائدہ اُٹھایا وہ بھی جلد یا بدیر سامنے آ ہی جائے گا، لیکن یہ بات تو طے ہے کہ چودہ جنوری سے لے کر کل سترہ جنوری تک کے عرصے میں عوام کے ساتھ وہی ہوا کہ کھایا پیا کچھ نہیں گلاس توڑا بارہ آنے۔۔۔لیکن عوام نے تو گلاس بھی نہیں توڑا اور بارہ آنے کی چپت بھی کھانی پڑی۔ ان چار دنوں میں ملکی معیشت جو پہلے ہی زبوں حالی کا شکار ہے، شدید دباؤ سے دوچار رہی۔ کاروباری سرگرمیاں اگر ماند نہیں پڑیں تو ٹھہراؤ کی کیفیت ضرور طاری رہی۔

بہت سے تجزیہ نگار اس تمام ایونٹ کو نہایت پُرامن قرار دے رہے ہیں، بلاشبہ قادری کا لانگ مارچ اور تین روزہ دھرنا پُرامن رہا، لیکن اس کا تمام کریڈٹ ہمارے خیال میں تو حکمرانوں کی حکمت عملی کو دیا جانا چاہیئے کہ انہوں نے کسی قسم کا ایکشن نہیں لیا ، بلکہ لانگ مارچ اور دھرنے کے منتظمین سے مذاکرات کے دوران اعلیٰ حکام ان کے بہت سے مطالبات تسلیم کرتے رہے۔ اس دوران ایک موقع ایسا آیا تھا کہ جب صورتحال خراب ہونے جارہی تھی جب  پولیس کے مطابق دھرنے کے شرکاء میں سے کسی نے فائرنگ کی جس کے جواب میں پولیس نے شیلنگ کی، لیکن وزیر داخلہ رحمان ملک نے فوراً ہی یہ ہدایات جاری کیں کہ طاہرالقادری ہمارے مہمان ہیں اور ان کی حفاظت کرنا پولیس کا فرض ہے۔ انہوں نے واضح کیا کہ ہم چاہتے کہ کسی قسم کی کوئی پُرتشدد کارروائی نہ ہو۔پھر یہی رحمان ملک کے ہاتھ سے جب صبر کا دامن چھوٹنے لگا اور انہوں نے وارننگ دے ڈالی کہ کل شام تک اگر سڑکیں خالی نہ کی گئیں تو پھر ایکشن لیا جائے گا تو صدر پاکستان آصف علی زرادری نے اُن کے اس بیان کا سخت نوٹس لیا اور انہیں اس حوالے سے بیان دینے سے روک دیا گیا۔

کم ہی لوگ تھے جو قادری کے لانگ مارچ اور دھرنے کے متعلق بہت زیادہ پُرامید نظر آئے، لیکن اس دوران سازشی تھیوریوں کا منجن بیچنے والوں کا کاروبار بھی خوب چمکا۔ جس میں سب سے زیادہ پذیرائی اُس تھیوری کو ملی جس میں قادری کا تعلق کینیڈین کمپنی بیرک گولڈ سے جوڑا گیا تھا۔  اس کمپنی نے  بلوچستان کی سونے کی کان میں اربوں ڈالر کی سرمایہ کاری کر رکھی تھی، سپریم کورٹ نے نے اس کا  لائسنس کی منسوخ کردیا ہے اور اس  کی سرمایہ کاری خطرے میں پڑ چکی ہے۔  نون لیگ کے بعض اراکین اور رہنما بھی قادری کی اس تحریک کو زرداری کے پلان کا ایک حصہ قرار دیتے رہے۔ ان کا خیال تھا کہ وہ اس کے تحت نون لیگ کو اقتدار سے دور رکھنا چاہتے ہیں۔کچھ نے تو یہاں تک کہہ دیا کہ زرادری، قادری کے اس مصنوعی انقلاب کے ذریعے اقتدار فوج کے حوالے کردیں گے تاکہ اگلے انتخابات کے ذریعے نوازشریف اقتدار نہ سنبھال سکیں۔ بہت سے لوگ قادری کو فوج کے منصوبے کا ایک کردار قرار دیتے رہے، جس کے ذریعے ملک میں بحرانی کیفیت پیدا کرکے فوج اقتدار پر قبضہ کرنا چاہتی ہے۔

اور یہ خیال عام لوگوں کا ہی نہیں تھا بلکہ حکمران جماعت کے بہت سے لوگ بھی اسی طرز کی قیاس آرائی کررہے تھے۔ کل رائٹر نے اپنی ایک رپورٹ میں بھی فوج کے کردار کے حوالے سے بات کی تھی، مذکورہ رپورٹ میں رائٹر کے تجزیہ نگار نے لکھا تھا کہ:  ایک شعلہ بیان  مذہبی عالم کا قومی اسمبلی کے سامنے ہزاروں افراد کے ہمراہ احتجاجی دھرنا جاری ہے اور وہ مسلسل اس بات پر ڈٹے ہوئے ہیں کہ اپنے مطالبات پورے ہونے سے قبل وہاں سے نہیں اُٹھیں گے، اس صورتحال نے حکمران جماعت کو یہ سوچنے پر مجبور کردیا ہے کہ کہیں پاک فوج کی جانب سے کوئی نرم بغاوت کے لیے تیار منصوبہ نہ ہو۔ وہ دیکھ رہے ہیں کہ قادری اس طرح کے کسی مشن کے بہترین امیدوار ہوسکتے ہیں۔ ایک تجربہ کار مقرر ہونے کی وجہ سے انہوں نے کرپشن کے خلاف اپنی جذبات میں تلاطم پیدا کردینے والی تقاریر سے لوگوں کے اندر ایسی توانائی بھردی ہے کہ وہ تین دن سے ان کے کہنے پر کھلے آسمان کے نیچے سخت سردی میں دھرنا دیے ہوئے ہیں۔ایک معروف سیاسی لیڈر محمود خان اچکزئی جو سیاست میں فوج کے کردار پر ہمیشہ سے تنقید کرتے آئے ہیں، کا کہنا ہے کہ ‘صورتحال خطرناک رُخ اختیار کرتی جارہی ہے اور شواہد اشارہ کرتے ہیں کہ تیسری قوت اپنی روایت کے تحت غیرآئینی طریقے اپنا سکتی ہے۔’

اور ان قیاسات کو سہارا اس بات سے ملتا ہے کہ قادری نے انیس سو ننانوے میں فوج کی طرف سے ملک کے اقتدار پر قبضہ کرنے کے عمل کی بھر پور حمایت کی تھی۔ ان کے موجودہ مقاصد کو دیکھتے ہوئے بہت سے سیاستدانوں  کو شبہ ہے کہ قادری موجودہ حکومت کے خاتمے اور نگران حکومت میں آرمی کے کردار کے لیے راستہ نکالنے کی کوشش میں مصروف ہیں۔

رائٹر کی رپورٹ میں تحریر تھا کہ  پاکستان اپنی آزادی  کے بعد پیسنٹھ سالوں میں  سے نصف سے زیادہ برس فوجی حکمرانی دیکھ چکا ہے۔ اس کے علاوہ ناقدین کا کہنا ہے کہ حکمران جماعت پاکستان پیپلز پارٹی فوج کے ساتھ تصادم کا ایک طویل ریکارڈ رکھتی ہے، اکثر اپنی کوتاہیوں پر بھی یوں پردہ ڈالتی رہی ہے کہ فوج نے اس سے ناجائز طور پر اقتدارچھینا تھا اور جب اس بات پر غور کیا جائے کہ اوّل تو قادری کینیڈا میں چھ سال گزارنے کے بعد اُس وقت واپس پلٹے ہیں جب کہ الیکشن کے انعقاد میں صرف چند ماہ ہی باقی رہ گئے ہیں، دوسرےیہ کہ انہوں نے انیس سو ننانوے میں آرمی چیف پرویز مشرف کے اقتدار پر قبضہ کرنے کی کھلی حمایت کی تھی تو بہت سے ذہنوں میں خطرے کی گھنٹیاں بجنا غلط بھی نہیں ہے۔

ایک آرمی آفیسر نے ذاتی طور پر رائٹر کو بتایا کہ موجودہ حکمرانوں مسلح دہشت گردی کا خاتمہ کرنے کے اہل نہیں ، یہ اشیائے خوردونوش کی بڑھتی ہوئی قیمتوں اور مہنگائی کو روکنے سے قاصر رہے ہیں اور ملکی معیشت کو اس سطح پر لانے میں بھی ناکام ثابت ہوئے ہیں جس سطح پر وہ مارچ دوہزار آٹھ میں اس کے اقتدار سنبھالنے کے وقت تھی۔ ایک فوجی افسر نے رائٹر کو اپنی ذاتی رائے دیتے ہوئے کہا کہ فوج کی خواہش نہیں ہے کہ وہ اقتدار پر قبضہ کرے لیکن اُسے اگر مجبور کیا گیا کہ وہ مختلف سیاسی دھڑوں کے درمیان ثالثی کردار ادا کرسکتی ہے یا پھر اُس صورت میں کہ قادری کا احتجاج کوئی بحرانی کیفیت پیدا کرنے کا سبب بن جائے ۔ افسر نے کہا کہ ‘جب صورتحال زیادہ بگڑ جائے تو ممکن ہے کہ آرمی مداخلت کی ضرورت محسوس کرے ۔’

لیکن شکر ہے کہ صورتحال اس حد بگڑنے نہ پائی اور معاملہ ختم ہوگیا۔ اس طرز کے واقعات سے فائدہ اُٹھانے والوں میں ہمارے ہاں کا نومولود میڈیا بھی آگے آگے رہتا ہے۔ اُس کو بھی اس طرز کے واقعات سے خوب اچھی خوراک ملتی رہی ہے، اسی لیے ایک عشرے سے بھی کم عرصے میں اس کا اچھا تن و توش بن گیا ہے، بلکہ اب تو اس کا شمار بھی ملک کے اسٹیک ہولڈرز میں کیا جانے لگا ہے۔ شاید چار دن کے اس میگا ایونٹ  سے ہمارے میڈیا کو گویا پورے سال کی خوراک تو مل ہی گئی ہوگی؟ ہمارے ہاں نہ تو آج تک اس کا کوئی سائنسی تجزیہ ہوسکا ہے اور نہ ہی ہونے کا امکان ہے، اگر ہو تو پتہ چلے کہ میڈیا کے اس مسلسل باخبر رکھنے کی کوششوں نے عوام کی اکثریت کو کس حد تک بےحس بنادیا ہے۔

اسلام آباد سے لانگ مارچ کے شرکاء تو اپنے اپنے گھروں کو واپس لوٹ چکے ہیں لیکن ڈان نیوز کی ایک رپورٹ کے مطابق جناح ایونیو پر ایک سو ٹن کوڑا کرکٹ چھوڑ گئے ہیں۔۔۔۔۔۔فوٹو رائٹر

قادری نے اپنے اہداف کے حصول میں کامیابی حاصل کی ہو یا نہیں، لیکن انہیں اس دوران جس طرح بے تحاشہ  شہرت حاصل ہوئی، اس کے سامنے ان کی گزشتہ تیس سال کی کوششوں سے حاصل ہونے والی شہرت محض دس بیس فیصد ہی ہوگی۔ اس لیے کہ اس دوران ہر جگہ گفتگو کا موضوع ان کی ہی شخصیت رہی، لوگوں کی بڑی تعداد ان کے بارے میں جاننا چاہتی تھی۔ اس لیے کہ گزشتہ سات سالوں سے ملک سے باہر رہنے کی وجہ سے ان کی شخصیت ایک حد تک پس منظر میں چلی گئی تھی۔

الیکٹرانک میڈیا کے ساتھ ساتھ شوشل میڈیا پر بھی ایک ہفتے سے قادری ہی چھائے رہے۔ گو کہ ان کے پیروکار شوشل میڈیا پر دیگر پیروں اور مذہبی رہنماؤں کے پیروکاروں کے برعکس خاصے منظم اور متحرک ہیں، لیکن وہ اس مرتبہ قادری کے خلاف  پوسٹس کا مقابلہ نہ کرسکے۔ ناصرف لوگوں نے قادری کی تحریک پر نہایت سنجیدہ بحث و مباحثے شروع کیے بلکہ اس حوالے سے طنز و مزاح کا بھی گویا ایک سیلاب سا آگیاتھا، لیکن اس سیلاب میں شدید طغیانی اس وقت پیدا ہوئی جب کل رات قادری نے حکومتی وفد کے ساتھ مذاکرات کی کامیابی اور معاہدہ طے پانے کا اعلان کیا۔ خاص طور پر مولانا فضل الرحمان کے ایک بیان ‘کھودا پہاڑ نکلا چوہا اور وہ بھی مرا ہوا ’ کو لوگوں کی بڑی تعداد نے ٹوئٹر اور فیس بک پر شیئر کیا۔

ایک صاحب نے اپنے کمنٹس میں لکھا

قادری کے مارچ نے یزید سے مذاکرات کرلیے اور یزید وقت کے ہاتھ پہ بیت کر لی۔ تبدیلی بدنام ہوئی قادری تیرے لیے

قادری اور حکومت کے معاہدے کے تناظر میں ایک صاحب نے یہ شعر پوسٹ کیا

ہمارے عہد کے "عالم " ہیں  ذہین بہت ضمیر بیچ کے شہرت خرید لیتے ہیں

ایک صاحب کا تبصرہ تھا کہ: دھرنا ختم ہونے کے بعد "بہشتی کنٹینر" کو فیض آباد فلائی اوور کے سجے پاسے "دربار" بنا کر رکھا جائے گا۔ تا کہ تبدیلی کے خواہش مند لوگ باسہولت مرادیں مانگ سکیں۔

خالد محمود نے اس موقع پر یہ شعر موزوں کیا

فیس بک کی ورلڈ میں اے قادری ایسے ویسے کیسے کیسے ہو گئے ہے حقیقت میں الگ دنیا، جہاں کیسے کیسے ایسے ویسے ہو گئے

قادری کی تصویر کے ساتھ یہ شعر بھی لوگوں کی بہت بڑی تعداد نے فیس بک پر پوسٹ کیا

عجیب تیری سیاست، عجیب تیرا نظام حسین سے بھی مراسم، یزید کو بھی سلام

مرزا یاسین بیگ نے فیس بک پر ایک مختصر مضمون پوسٹ کیا، جس کا عنوان تھا: فوجی منڈے کو کرپٹ پولیٹیکل ونگ نے چت کردیا

ڈان اردو ڈاٹ کام پر کل پبلش ہونے والے خدا بخش ابڑو کے بلاگ ‘سب کچھ لائیو ہے ’ کے اقتباسات اور اس کے لنک کو بھی لوگوں کی بڑی تعداد فیس بک پر شیئرکرتی رہی۔

شفقت عزیز نے لکھا کہ : ‘قادری کی کامیاب کاوشوں سے تین ماہ میں ہونے والے انتخابات اب نوے دن میں ہوں گے۔ ’

فرخ منظور نے یہ شعر طاہر القادری کے نام معنون کیا

جو طلب پہ عہدِ وفا کیا، تو وہ آبروئے وفا گئی سرِ عام جب ہوئے مُدّعی، تو ثوابِ صدق و صفا گیا

یہ شعر بھی لوگوں کی بہت بڑی تعداد شیئر کرتی رہی

شیخ صاحب سے رسم و راہ نہ کی شکر ہے زندگی تباہ نہ کی

شعر کے حوالے سے دیکھا جائے تو پھر یہ کہنا غلط نہ ہوگا کہ اس حوالے سے فیس بک پر  سب سے زیادہ مقبولیت حنیف سمانا کے اس شعر کو حاصل ہوئی، جسے لوگوں کی بہت بڑی تعداد نے شیئر کیا

کیسی انوکھی داستان سب کو سنا گیا اک شخص سارے شہر کو ماموں بنا گیا

طاہر القادری کے حوالے سے فیس بک پر یہ خبر بھی گردش میں ہے کہ وہ ستائیس جنوری کو کینیڈا روانہ ہوجائیں گے۔ اس حوالے سے آج نیوز کی ایک خبر کا وڈیو کلپ بھی شیئر کیا جارہا ہے۔

قادری کے لانگ مارچ میں سیکیورٹی کے فرائض انجام دینے والی خواتین، جنہوں نے سخت سردی اور بارش میں بھی اپنے فرائض جانفشانی سے ادا کیے لیکن قادری حکومتی مذاکراتی ٹیم سے اپنے چار میں سے دو نکات بھی پوری طرح منظور نہیں کروا پائے۔۔۔۔۔۔۔۔فوٹو رائٹر

کل انہوں نے دھرنے کے شرکاء کو نماز شکرانہ ادا کرنے کی ہدایت کی اور ساتھ ہی یہ اعلان بھی کیا کہ کل کا دن بالکل نیا ہوگا۔اب جبکہ نیا دن شروع ہوکر نصف گزر بھی چکا ہے، سوال یہ ہے کہ ملک میں کیا وہ سب کچھ تبدیل ہوگیا  ہے جس کو تبدیل کردینے کا دعویٰ قادری نے کیا تھا، یا جس تبدیلی کے لیے ان کے لانگ مارچ میں اور پھر دھرنے میں لوگوں کی بڑی تعداد نے شرکت کی تھی؟