ملائیشیا کے سابق وزیر اعظم عبداللہ احمد بداوی انتقال کر گئے
ملائیشیا کے سابق وزیر اعظم عبداللہ احمد بداوی 85 برس کی عمر میں انتقال کر گئے۔
ڈان اخبار میں شائع خبر رساں ادارے ’رائٹرز‘ کی رپورٹ کے مطابق عبداللہ احمد بداوی 2003 میں 22 سالہ اقتدار کے بعد مہاتیر محمد کے وزارت عظمیٰ سے مستعفی ہونے کے بعد ملائیشیا کے پانچویں وزیر اعظم بنے تھے۔
ملائیشیا کے سابق وزیر اعظم کے داماد اور سابق وزیر صحت خیری جمال الدین نے انسٹاگرام پوسٹ میں موت کی وجہ بتائے بغیر بتایا کہ ’سابق وزیر اعظم شام 7 بجکر 10 منٹ پر دارالحکومت کوالالمپور کے نیشنل ہارٹ انسٹی ٹیوٹ میں انتقال کر گئے۔‘
انسٹی ٹیوٹ نے ایک بیان میں کہا کہ عبداللہ کو سانس لینے میں دشواری کے بعد اتوار کے روز نیشنل ہارٹ انسٹی ٹیوٹ میں داخل کرایا گیا تھا اور انہیں فوری طور پر انتہائی نگہداشت میں رکھا گیا تھا۔
انسٹی ٹیوٹ نے کہا کہ ’تمام تر طبی کوششوں کے باوجود وہ اپنے پیاروں کی موجودگی میں انتقال کرگئے‘۔
مسلم اکثریتی ملک کے وزیر اعظم کی حیثیت سے عبداللہ نے بدعنوانی کے خلاف مہم کا آغاز کیا اور اسلام کے اعتدال پسند ورژن کی حمایت کی جس کا مقصد معاشی اور تکنیکی ترقی تھا۔
لائیو ٹی وی