پاکستان سپر لیگ کے دسویں ایڈیشن کے چوتھے میچ میں لاہور قلندرز نے کوئٹہ گلیڈی ایٹرز کو 79 رنز سے شکست دے دی۔

راولپنڈی کرکٹ اسٹیدیم میں کھیلے گئے میچ میں لاہور قلندرز نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 219 رنز بنائے۔

ہدف کے تعاقب میں کوئٹہ گلیڈی ایٹرز کا اچھا آغاز نہ مل سکا اور وقفے وقفے سے وکٹیں گرنے کا سلسلہ جاری رہا، پوری ٹیم 16.2 اوورز میں 140 رنز پر پویلین واپس لوٹ گئی۔

کوئٹہ گلیڈی ایٹرز بیٹنگ

رواں سیزن کے پہلے میچ میں پشاور زلمی کو ٹیم کو جارحانہ آغاز فراہم کرنے والے دونوں اوپنرز لاہور قلندرز کے خلاف ناکام ثابت ہوئے، کپتان سعود شکیل ایک اور فن ایلن کھاتہ کھولے بغیر ہی پویلین واپس لوٹ گئے۔

حسن نواز بھی صرف ایک رن کے ہی مہمان ثابت ہوئے جب کہ کشال مینڈس نے 28 رنز کی اننگز کھیلی، ریلی روسوو نے کچھ مزاحمت دکھائی تاہم وہ بھی 44 رنز پر ہمت ہار گئے۔

شعیب ملک 14، عقیل حسین 13، فہیم اشرف 21، محمد عامر ایک، ابرار احمد 6 رنز بناکر آؤٹ ہوئے۔

لاہور قلندرز کی جانب سے رشاد حسین نے 3، شاہین آفریدی، آصف آفریدی، سکندر رضا نے 2،2 وکٹیں حاصل کیں۔

لاہور قلندرز بیٹنگ

اس سے قبل، کوئٹہ گلیڈی ایٹرز کے کپتان سعود شکیل نے ٹاس جیت کر لاہور قلندرز کو پہلے بیٹنگ کی دعوت دی۔

لاہور قلندرز کی جانب سے فخرزمان کے ساتھ اننگز کا آغاز کرنے والے محمد نعیم صرف 10 رنز کے مہمان ثابت ہوئے، تاہم عبداللہ شفیق نے 37 رنز کی جارحانہ اننگز کھیل کر آؤٹ ہوئے۔

فخر زمان نے اپنی نصف سینچری مکمل کی، وہ 39 گیندوں پر 67 رنز بناکر آؤٹ ہوئے جس میں 3 چھکے اور 7 چوکے شامل تھے، ڈیرل مچل 37، سکندر رضا 6 اور کپتان شاہین آفریدی 3 رنز بناکر آؤٹ ہوئے۔

لاہور قلندرز کے وکٹ کیپر بلے باز سیم بلنگز نے آخری لمحات میں جارحانہ کھیل پیش کرکے ٹیم کا ٹوٹل مستحکم کیا، وہ 19 گیندوں پر 50 رنز بناکر ناٹ آؤٹ رہے۔

کوئٹہ گلیڈی ایٹرز کی جانب سے عقیل حسین اور ابرار احمد نے 2،2 جب کہ فہیم اشرف اور عثمان طارق نے ایک ایک وکٹ حاصل کی۔

واضح رہے کہ کوئٹہ گلیڈی ایٹرز نے اپنے پہلے میچ میں پشاور زلمی کو 80 رنز سے شکست دی تھی جب کہ لاہور قلندرز کو اسلام آباد یونائیٹڈ کے ہاتھوں شکست ہوئی تھی۔