12 اپریل کو انتشار پھیلایا گیا تو مزاحمت کریں گے، ڈمپر ایسوسی ایشن کا 16 اپریل کو احتجاج کا اعلان
آل ڈمپر ٹرک ٹرانسپورٹ اونرز ایسوسی ایشن کراچی کے صدر حاجی لیاقت محسود نے ملک بھر میں 16 اپریل کو احتجاج کا اعلان کرتے ہوئے خبردار کیا کہ اگر 10 یا 12 اپریل کو انتشار پھیلایا گیا تو مزاحمت کریں گے۔
کراچی پریس کلب میں عہدیداران کے ہمراہ پریس کانفرنس کرتے ہوئے آل ڈمپر ٹرک ٹرانسپورٹ اونرز ایسوسی ایشن کے صدر حاجی لیاقت محسود کا کہنا تھا کہ سندھ حکومت نے صبح 6 سے 10 بجے تک پابندی لگائی تو ہم نے اس پر عملدرآمد کیا۔
انہوں نے کہا کہ کراچی میں رواں سال کے دوران اب تک ہونے والے ٹریفک حادثات کے باعث 249 لوگ جاں بحق ہوئے ہیں جن میں سے صرف 17 لوگ ڈمپر سے جاں بحق ہوئے اور سب کو معلوم ہے کہ سڑک پر کسی بھی وقت حادثات ہوسکتے ہیں۔
ڈمپر ایسوسی ایشن کے صدر نے میئر کراچی، آئی جی سندھ، ڈی آئی جی ٹریفک سے مطالبہ کیا کہ وہ باقی گاڑیوں پر پابندی لگائیں کیونکہ ہم نے پابندی پر عملدرآمد کیا ہے لیکن بڑی گاڑیاں اور بسز چل رہی ہیں۔
انہوں نے خبردار کیا کہ 10 یا 12 اپریل کو کسی قسم کا انتشار پھیلایا گیا تو اس کے خلاف بھرپور مزاحمت ہوگی اور جو پارٹی اس پر سیاست کر رہی ہے، ان کے لیے 16 اپریل کو جمع ہوں گے اور پورے ملک میں احتجاج کریں گے۔
سندھ حکومت کی جانب سے ہیوی ٹریفک کے لیے اوقات کار سمیت متعدد قوانین نافذ کرنے کے باوجود کراچی میں حادثات میں کمی نہ آسکی، آج بھی ماڑی پور میں ٹریلرکی زد میں آکر 8 سالہ بچہ جاں بحق ہوگیا، پولیس نے ڈرائیور کو گرفتار کرلیا۔
واضح رہے کہ کراچی میں بڑھتے ٹریفک حادثات پر مہاجر قومی موومنٹ کے سربراہ آفاق احمد نے 12 اپریل کو مافیا کے خلاف احتجاجی مظاہرے کا اعلان کررکھا ہے۔
آفاق احمد نے اس مظاہرے کو ’سفید پرچم تحریک‘ کا نام دیتے ہوئے کہا ’ یہ احتجاج کسی سیاسی جماعت، قومیت یا فرقے کا نہیں بلکہ اس شہر میں بسنے والی عوام کے لیے ہے، اگر حکومت نے پُرامن مظاہرین کو روکا تو پھر عوام اپنے جھنڈوں کے ڈنڈوں سے مافیاز کا مقابلہ کریں گے’۔
لائیو ٹی وی