متحدہ عرب امارات (یو اے ای) میں کام کرنے کے لیے ملازمت کی پیشکش حاصل کرنا ایک دلچسپ موقع ہوسکتا ہے، لیکن کوئی بھی وعدہ کرنے سے پہلے اس بات کو یقینی بنانا ضروری ہے کہ یہ پیشکش حقیقی ہے، تاکہ جعلی ملازمت کی آفرز اور ویزا فراڈ سے بچا جاسکے، جو ملازمت تلاش کرنے والوں کو دھوکا دہی اور استحصال کا شکار بنا سکتے ہیں۔

گلف نیوز کے مطابق خوش قسمتی سے یو اے ای کی وزارت انسانی وسائل اور امارائزیشن (ایم او ایچ آر ای) کے ذریعے ملازمت کی پیشکش اور بھرتی کرنے والی کمپنی کے حقیقی ہونے، دونوں کی تصدیق کرنے کے سرکاری طریقے موجود ہیں۔

ملازمت کی پیشکش کی تصدیق کیسے کریں؟

اگر آپ کو متحدہ عرب امارات میں کام کرنے کے لیے ملازمت کی پیشکش ملتی ہے تو اس بات کو یقینی بنانا ضروری ہے کہ پیشکش حقیقی اور سرکاری طور پر تسلیم شدہ ہے، ملازمت کی تمام جائز پیشکشیں متحدہ عرب امارات کی وزارت برائے انسانی وسائل اور امارائزیشن (ایم او ایچ آر ای) کے ذریعے جاری کی جانی چاہئیں۔

آجروں کو ورک پرمٹ کے لیے درخواست دیتے وقت ایم او ایچ آر ای کے ذریعے منظور شدہ معاہدہ فارم استعمال کرنے کی ضرورت ہوتی ہے، ملازمت کی پیشکش کے ان فارمز میں ایک منفرد سیریل نمبر یا بارکوڈ شامل ہوتا ہے جس سے آپ آسانی سے ان کی صداقت کی تصدیق کرسکتے ہیں۔

اگرچہ ملازمت کے معاہدے میں ابتدائی پیشکش میں درج اضافی فوائد شامل ہوسکتے ہیں، لیکن آفر لیٹر معاہدے کی بنیاد رہتا ہے اور متفقہ شرائط و ضوابط کے مطابق ہونا چاہیے۔

آفر لیٹر میں کیا شامل ہونا چاہیے؟

ایم او ایچ آر ای کے مطابق، وزارت کی طرف سے جاری کردہ ہر جائز آفر لیٹر میں معاہدے کی قسم، تنخواہ (ماہانہ، روزانہ، کمیشن پر مبنی، وغیرہ)، ہفتہ وار چھٹی کا حق، نوٹس کی مدت اور دیگر متعلقہ شرائط، ملازمت کی ابتدا کی تاریخ، کام کا عنوان یا کردار، کمپنی نمبر لازمی شامل ہونا چاہیے۔

ملازمت کی پیشکش کی تصدیق کیسے کریں؟

اگر آپ متحدہ عرب امارات سے باہر ہیں اور ملازمت کی پیشکش موصول ہوئی ہے تو، پہلا قدم اپنے ملک میں متحدہ عرب امارات کے سفارتخانے سے چیک کرنا ہے، سفارتخانے کے حکام اس بات کی تصدیق کرنے میں مدد کرسکتے ہیں کہ آیا پیشکش حقیقی ہے یا نہیں؟ آپ ایم او ایچ آر ای کی آن لائن انکوائری سروس کا استعمال کرتے ہوئے اپنی ملازمت کی پیشکش کی تصدیق بھی کرسکتے ہیں، جس کے لیے www.mohre.gov.ae پر ایم او ایچ آر ای کی سرکاری ویب سائٹ ملاحظہ کریں۔

ویب سائٹ پر جاکر مینو پر جائیں اور خدمات پر کلک کریں، ڈراپ ڈاؤن فہرست سے نئی انکوائری سروسز منتخب کریں، خدمات کے صفحے پر انکوائری سروسز پر کلک کریں، پھر نیچے اسکرول کریں اور ملازمت کی پیشکش کے لیے انکوائری کا انتخاب کریں۔

اس کے بعد آپ کو مندرجہ ذیل ملازمت کی پیشکش کی تفصیلات درج کرنے کے لیے کہا جائے گا، ٹرانزیکشن نمبر، کمپنی کا نمبر، کسی تاریخ سے آج تک، اجازت نامے کی قسم (اگر آپ ملازمت کی پیشکش کی تصدیق کرنے والے ملازم ہیں تو، ’تمام ورک پرمٹ‘ منتخب کریں)۔

مطلوبہ معلومات جمع کرنے کے بعد، اگر یہ باضابطہ طور پر ایم او ایچ آر ای کے ساتھ رجسٹرڈ ہے تو سسٹم آفر لیٹر ظاہر کرے گا، اگر لیٹر سسٹم میں نہیں ہے تو، پیشکش دھوکا دہی ہوسکتی ہے، یا آجر کی طرف سے مناسب طریقے سے پیش نہیں کی گئی ہے۔

زیادہ تر آفر لیٹرز میں ٹرانزیکشن نمبر اور کمپنی نمبر کا ذکر ہوگا، یہ اس وقت تیار کیے جاتے ہیں جب آجر یا بھرتی ایجنسی ایم او ایچ آر ای کے سسٹم میں پیشکش اپ لوڈ کرتی ہے، اگر وہ شامل نہیں ہیں تو، آپ کو آجر سے انہیں فراہم کرنے کے لیے کہنا چاہیے۔

ایک بار آفر لیٹر پر دستخط ہونے کے بعد، آجر آپ کو متحدہ عرب امارات میں داخل ہونے کے لیے روزگار کا ویزا جاری کرے گا، آپ اپنے داخلے کے اجازت نامے کی صداقت کی تصدیق کرنے کے لیے روزگار ویزا کے عمل کے نکات 8 اور 9 کا حوالہ دے سکتے ہیں۔

اس بات کو یقینی بنانا بھی ضروری ہے کہ آپ کے ملازمت کے معاہدے کی شرائط متحدہ عرب امارات پہنچنے سے پہلے دستخط کردہ ملازمت کی پیشکش سے میل کھاتی ہیں۔

آجروں کو آپ کو آپ کے ریکارڈ کے لیے دستخط شدہ ملازمت کی پیشکش کی ایک کاپی فراہم کرنے کی ضرورت ہے۔

کیسے چیک کریں کہ کمپنی درست ہے یا نہیں؟

اس بات کی تصدیق کرنے کے لیے کہ کمپنی قانونی طور پر موجود ہے، اور متحدہ عرب امارات میں باضابطہ طور پر لائسنس یافتہ ہے، آپ نیشنل اکنامک رجسٹری (این ای آر) کا استعمال کرتے ہوئے اس کی تفصیلات تلاش کرسکتے ہیں، اس کے لیے www.growth.gov.ae پر این ای آر کی سرکاری ویب سائٹ ملاحظہ کریں۔

مرکزی مینو سے خدمات کے تحت، اقتصادی لائسنس کے بارے میں پوچھ گچھ پر کلک کریں، پوچھ گچھ کے صفحے پر ری ڈائریکٹ کرنے کے لیے اپنے یو اے ای پاس اکاؤنٹ کا استعمال کرتے ہوئے لاگ ان کریں۔

عربی اور انگریزی دونوں میں کاروباری نام درج کریں، اور آگے بڑھنے کے لیے کیپچا کی تصدیق مکمل کریں۔

یہاں آپ کو کمپنی کے لائسنسنگ اور قانونی حیثیت کے بارے میں تفصیلی معلومات تک رسائی فراہم کی جائے گی۔