بجلی کے نرخوں میں کمی، اسٹاک مارکیٹ میں تیزی، 100 انڈیکس نئی بلند ترین سطح پر پہنچ گیا
پاکستان اسٹاک ایکسچینج (پی ایس ایکس) میں تیزی کا سلسلہ جمعہ کو بھی جاری ہے اور کے ایس ای-100 انڈیکس ایک ہزار 800 پوائنٹس اضافے کے ساتھ ایک لاکھ 20 ہزار 793 کی بُلند ترین سطح پر پہنچا۔
صبح 10 بجے بینچ مارک ’کے ایس ای 100‘ انڈیکس ایک ہزار 855 پوائنٹس یا 1.56 فیصد اضافے کے ساتھ ایک لاکھ 20 ہزار 793 کی سطح پر پہنچ گیا تھا۔
تاہم، یہ رجحان برقرار نہیں رہ سکا، اور کاروبار کے اختتام پر انڈیکس 146 پوائنٹس یا 0.12 فیصد تنزلی سے ایک لاکھ 18 ہزار 792 پر آگیا، جو گزشتہ روز ایک لاکھ 18 ہزار 938 کی سطح پر بند ہوا تھا۔
ٹاپ لائن سیکیورٹیز کے چیف ایگزیکٹو محمد سہیل نے ڈان ڈاٹ کام کو بتایا کہ ’عالمی منڈیوں میں گرتی ہوئی کمی کے باوجود انڈیکس، حکومت کی جانب سے بجلی کے نرخوں میں کمی کے بعد بہتر آمدنی کی توقعات کے ساتھ ساتھ گردشی قرضے کو حل کرنے کے وعدے کے باعث ایک لاکھ 20 ہزار کی سطح عبور کر گیا۔‘
گزشتہ روز وزیر اعظم شہباز شریف نے ملک بھر میں بجلی کے نرخوں میں 7 روپے 41 پیسے فی یونٹ کمی کا اعلان کرتے ہوئے ’بڑے‘ ریلیف پیکج میں شہریوں کو بجلی کے بے تحاشا بلوں کا سامنا کرنے والے بوجھ کو کم کرنے کا اعلان کیا تھا۔
اسلام آباد میں ایک تقریب سے خطاب کرتے ہوئے وزیر اعظم نے قوم کو مبارکباد دی اور کہا کہ عالمی مالیاتی فنڈ (آئی ایم ایف) کو کٹوتی پر راضی کرنا آسان نہیں تھا، انہوں نے مزید کہا تھا کہ ان کی ٹیم نے یہ کارنامہ انجام دینے کے لیے بہت کوششیں کی ہیں۔
انہوں نے صنعتوں کے لیے بجلی کی قیمتوں میں 7 روپے 69 پیسے کمی کا اعلان کیا تھا۔
تجزیہ کاروں کا کہنا ہے کہ وزیراعظم کی جانب سے بجلی کے نرخوں میں کمی مارکیٹ کی کارکردگی کی ایک بڑی وجہ ہے۔
لائیو ٹی وی