6 کینالز منصوبے کیخلاف سندھ کے مختلف شہروں میں پیپلزپارٹی کی احتجاجی مشعل بردار ریلیاں
سندھ کے مختلف شہروں میں دریائے سندھ پر 6 کینالوں کے منصوبے کے خلاف احتجاجی مشعل بردار ریلیاں نکالی گئیں۔
سماجی رابطے کی ویب سائٹ فیس بک کے مطابق سندھ کے صدر نثار کھوڑو کی قیادت میں دریائے سندھ پر 6 کینالوں کے منصوبے کے خلاف میروخان میں بھٹو پیٹرول پمپ سے عرضی بھٹو چوک تک احتجاجی مشعل بردار ریلی نکالی گئی۔
پوسٹ کے مطابق مشعل بردار ریلی میں شامل سیکڑوں پیپلز پارٹی کے کارکنان کی سندھو دریا پر کینال نامنظور کی نعرے بازی کی ، صدر پی پی پی سندھ نثار کھوڑو کا مشعل بردار ریلی سے خطاب کیا۔
نثار کھوڑو کا کہنا تھا کہ 6 کینالوں کا منصوبہ سندھ اور سندھ کے لوگوں کے لیے موت کا منصوبہ اور سندھ کے وجود کے خلاف سازش ہے، پانی زندگی ہے اور پیپلز پارٹی کسی کو بھی سندھ کے لوگوں کی زندگیوں سے کھیلنے نہیں دے گی۔
نثار کھوڑو کا کہنا تھا کہ 6 کینالوں کا منصوبہ غیر آئینی اور غیرقانونی ہے اس لیے وفاقی حکومت کینال منصوبے سے دستبرداری کا اعلان کرے، اگر مسلم لیگ (ن) کی وفاقی حکومت کینالوں کے لیے بضد ہے تو سندھ بھی کینالوں کے خلاف ایک ہے۔
انہوں نے مزید کہا کہ کوٹڑی سے نیچے پانی نہ ہونے کہ وجہ سے سندھ کی 40 لاکھ ایکڑ سے زائد ایراضی بنجر بن گئی ہے۔
نثار کھوڑو کا کہنا تھا کہ سندھ کے دریا پانی کی سخت کمی کی وجہ سے کربلا کا منظر پیش کر رہے ہیں، ارسا کی جانب سے نگران حکومت میں پانی کی اضافی موجودگی کے سرٹیفیکیٹ جاری کرنا غیر آئینی اور سندھ دشمنی عمل ہے۔
پیپلزپارٹی سندھ کے صدر کا مزید کہنا تھا کہ ارسا کی از سر نو تشکیل کی جائے اور ارسا چیئرمین سمیت ارسا میں وفاقی رکن سندھ سے لیا جائے، سندھ نے ارسا کے یکطرفہ پانی موجودگی کے فیصلے کو سی سی آئی میں چیلینج کردیا ہے۔
نثار کھوڑو نے کہا کہ سی سی آئی کا اجلاس بلا کر سندھ کے آئینی اعتراضات سن کر متنازع کینال منصوبہ ختم کیا جائے، پیپلز پارٹی دریائے سندھ پر کوئی کینال نہیں بننے دے گی نہ ہی کسی کو پانی پر ڈاکا ڈالنے دینگے۔
نثار کھوڑو کا مزید کہنا تھا کہ پیپلز پارٹی نے ماضی میں بھی تھل کینال اور کالاباغ ڈیم کے خلاف تحریک چلائی اب بھی 6 کینالوں کے خلاف تحریک چلائیں گے، پورے سندھ میں کینالوں کے خلاف مشعل بردار ریلیاں نکال کر عوام نے بتادیا ہے کہ سندھ کو 6 کینالوں کا منصوبہ کسی صورت قبول نہیں ہے۔
نثار کھوڑو کا مزید کہنا تھا کہ پانی کے مسئلے پر مشترکہ جدوجہد اور ایک آواز بننے کی ضرورت ہے، جس طرح مشترکہ جدوجہد کے ذریعے کالاباغ ڈیم منصوبے کو مسترد کرایا تھا اسی طرح 6 کینال منصوبے کو بھی مسترد کرائیں گے۔
نثار کھوڑو نے مشعل بردار ریلی سے خطاب کرتے ہوئے مزید کہا کہ پیپلز پارٹی کو روڈ راستے بھی دیکھے ہوئے ہیں اور تحریکیں بھی چلانی آتی ہیں اس لیے سندھ دشمن منصوبوں سے باز آجاؤ۔
لائیو ٹی وی