شہباز شریف سے پاکستان میں تعینات چینی سفیر کی ملاقات، تعلقات نئی بلندیوں تک پہنچانے کا عزم
وزیر اعظم شہباز شریف نے چین-پاکستان اقتصادی راہداری (سی پیک)کے تحت مختلف اقدامات اور منصوبوں کے بروقت نفاذ اور تکمیل کو یقینی بنانے کے لیے دونوں ممالک کو مل کر کام کرنے کی اہمیت پر زور دیتے ہوئے کہا ہے کہ دونوں ممالک کی قیادت اور عوام تعلقات کو نئی بلندیوں تک پہنچانے کے لیے پر عزم ہیں۔
سرکاری خبر رساں ادارے ’اے پی پی‘ کی رپورٹ کے مطابق ان خیالات کا اظہار انہوں نے پاکستان میں تعینات چینی سفیر جیانگ زیڈونگ سے وزیراعظم ہاؤس اسلام آباد میں گفتگو کرتے ہوئے کیا۔
ملاقات کے دوران وزیراعظم نے چین کے صدر شی جن پنگ اور وزیر اعظم لی کیانگ کے لیے نیک خواہشات کا اظہار کیا۔
انہوں نے قومی عوامی کانگریس اور چینی عوامی سیاسی مشاورتی کانفرنس کے ’دو اجلاسوں‘ کے کامیاب انعقاد پر چینی قیادت اور قوم کو مبارکباد بھی دی۔
شہباز شریف کا کہنا تھا کہ پاکستان اور چین کے دوطرفہ اسٹریٹجک تعلقات کی مثبت رفتار جس کا مظہر صدر آصف علی زرداری کا حالیہ دورہ چین ہے، اس حوالے سے اطمینان کا اظہار کرتے ہوئے وزیراعظم نے تمام بنیادی مسائل پر پاکستان کی دیرینہ اور مسلسل حمایت پر چین کا شکریہ ادا کیا۔
انہوں نے چین کے قومی دلچسپی کے امور پر پاکستان کی مسلسل اور غیر متزلزل حمایت کا بھی اعادہ کیا اور کہا کہ دونوں ممالک کی قیادت اور عوام پاک چین ’آل ویدر سٹریٹجک کوآپریٹو پارٹنرشپ‘ کو مزید مضبوط کرنے اور اسے نئی بلندیوں تک پہنچانے کے لیے پر عزم ہیں۔
ملاقات میں دونوں ممالک کے درمیان سیکیورٹی اور انسداد دہشت گردی تعاون پر پیش رفت پر بھی تبادلہ خیال کیا گیا، وزیراعظم نے مسرت کا اظہار کیا کہ اس سال صدر شی جن پنگ کے 2015 میں پاکستان کے تاریخی دورے کی دسویں سالگرہ منائی جا رہی ہے ۔
اس سلسلے میں وزیراعظم نے اس یادگار موقع کو شایان شان طریقے سے منانے کی ہدایات جاری کیں، انہوں نے صدر شی جن پنگ کو پاکستان کا سرکاری دورہ کرنے کے لئے اپنی انتہائی پرخلوص دعوت کی بھی تجدید کی۔
اعلامیے کے مطابق ملاقات کے دوران وزیر اعظم نے چین-پاکستان اقتصادی راہداری (سی پیک) کے تحت مختلف اقدامات اور منصوبوں کے بروقت نفاذ اور تکمیل کو یقینی بنانے کے لیے دونوں فریقوں کو مل کر کام کرنے کی اہمیت کو اجاگر کیا۔
رپورٹ میں بتایا گیا کہ چینی سفیر نے چینی قیادت کے لیے نیک خواہشات پر وزیراعظم کا شکریہ ادا کیا، انہوں نے وزیراعظم شہباز شریف کو پاک-چین دوطرفہ تعاون کی تازہ ترین پیش رفت سے آگاہ کیا۔
ملک میں میکرو اکنامک صورتحال کو بہتر بنانے میں حکومت کی کامیابیوں کو سراہتے ہوئے چینی سفیر نے اس بات کا اعادہ کیا کہ چین پاکستان کی قومی ترقی کوششوں میں اپنی مکمل حمایت اور تعاون جاری رکھے گا۔
لائیو ٹی وی