’مولا جٹ‘ پروڈیوسر محمد سرور بھٹی انتقال کر گئے
سینیئر فلم ساز محمد سرور بھٹی ہارٹ اٹیک کے باعث پنجاب کے دارالحکومت لاہور میں انتقال کر گئے۔
روزنامہ ڈان کے مطابق محمد سرور بھٹی 13 جنوری کو ہارٹ اٹیک کے باعث انتقال کر گئے، انہوں نے ماضی میں متعدد مقبول اور بلاک بسٹر فلمیں پروڈیوس کیں۔
محمد سرور بھٹی نے ’بابو پروڈکشن‘ کے بینر تلے فلم پروڈکشن کا کام جاری رکھا اور ماضی کی متعدد فلموں کو پروڈیوس کیا۔
ان کی جانب سے پروڈیوس کردہ مقبول ترین فلموں میں ’مولا جٹ، چن وریام اور بازار حسن‘ سمیت دیگر شامل ہیں۔
ان کی پروڈیوس کردہ فلم ’مولا جٹ‘ نے سلطان راہی اور مصطفیٰ قریشی جیسے اداکاروں کو سپر اسٹار بنایا جب کہ ان کی دیگر فلموں میں کام کرنے والے اداکار بھی انڈسٹری کے مقبول نام بنے۔
ملک میں سینما انڈسٹری کی زوال پذیری کے باعث محمد سرور بھٹی نے کافی سال قبل ہی فلموں کو پروڈیوس کرنا چھوڑ دیا تھا۔
محمد سرور بھٹی کے انتقال پر فلم انڈسٹری کی شخصیات نے اظہار افسوس کرتے ہوئے ان کی مغفرت کی دعائیں کیں۔
ان کی پروڈیوس کردہ فلم ’مولا جٹ‘ کے ریمیک کے ہدایت کار بلال لاشاری نے بھی انہیں خراج تحسین پیش کرتے ہوئے ان کی موت کو فلم انڈسٹری کے لیے نقصان قرار دیا۔
لائیو ٹی وی