کرم امن معاہدے کے دور رس نتائج آئیں گے، محسن نقوی
وزیرداخلہ محسن نقوی نے کہا ہے کہ کرم امن معاہدے کے دور رس نتائج آئیں گے، ملک دشمن قوتیں فائرنگ کی آڑ میں دراصل امن معاہدے کو سبوتاژ کرنا چاہتی تھیں، سرکاری گاڑیوں پر حملہ بزدل دشمن کی سوچی سمجھی سازش ہے۔
ڈان نیوز کے مطابق وزیرداخلہ محسن نقوی نے عوامی نیشنل پارٹی (اے این پی) کے سربراہ ایمل ولی خان سے وفاقی دارالحکومت اسلام آباد میں ملاقات کی۔
ملاقات کے دوران ملک کی مجموعی صورتحال سمیت خیبرپختونخوا کے معاملات پر تبادلہ خیال کیا گیا۔
دونوں رہنماؤں نے لوئر کرم کی تحصیل بگن میں سرکاری گاڑیوں پر فائرنگ کے واقعہ کی مذمت کرتے ہوئے ڈپٹی کمشنر کرم اور دیگر زخمیوں سے ہمدردی و یکجہتی کااظہار کیا۔
دونوں رہنماؤں نے خارجی دہشت گردوں کے خلاف سکیورٹی فورسز کی کارروائیوں کو سراہا۔
اس موقع پر محسن نقوی کا کہنا تھا کہ ملک دشمن قوتیں فائرنگ کی آڑ میں اصل میں امن معاہدے کو سبوتاژ کرنا چاہتی تھیں، سرکاری گاڑیوں پر حملہ بزدل دشمن کی سوچی سمجھی سازش ہے، دہشت گردوں اپنے مذموم عزائم ناکام رہے۔
انہوں نے کہا کہ خیبرپختونخوا حکومت سے رابطے میں ہیں، زخمی ڈپٹی کمشنر کرم کو علاج معالجے کی بہترین سہولتیں دی جا رہی ہیں، ڈپٹی کمشنر کرم کو ہیلی کاپٹر کے ذریعے پشاور منتقل کر دیا گیا، ڈپٹی کمشنر کرم کی جان سب سے زیادہ عزیز ہے۔
ان کا کہن تھا کہ سیکیورٹی فورسز اور امن جرگہ کی مخلصانہ کاوشوں کی قدر کرتے ہیں، گرینڈ جرگہ کے تمام عمائدین کا تہہ دل سے شکرگزار ہوں، لوگوں کے جان ومال کے تحفظ کے لیے کرم امن معاہدے کے دور رس نتائج سامنے آئیں گے۔
وزیرداخلہ کا کہنا تھا کہ پشاور میں ایپکس کمیٹی کے اجلاس میں پائیدار امن عامہ یقینی بنانے کے لیے اہم فیصلے کیے گئے، ان فیصلوں پر عملدرآمد سے علاقے میں پائیدار امن کی راہ ہموار ہو رہی ہے۔
محسن نقوی کا کہنا تھا کہ شہدا کی عظیم قربانیاں ناقابل فراموش ہیں، اپنی قیمتی جانیں قربان کرنے والے بہادر سپوتوں کو سلام پیش کرتے ہیں۔
اس موقع پر عوامی نیشنل پارٹی کے سربراہ ایمل ولی خان نے کہا کہ شہدا نے اپنے قیمتی لہو سے امن کی آبیاری کی ہے، پاکستان کی خاطر جانیں نچھاور کرنے والے قوم کے ہیرو ہیں۔
واضح رہے کہ آج خیبر پختونخوا کے ضلع کرم ایجنسی کے علاقے لوئر کرم میں پولیس، ایف سی پر حملے اور گاڑی پر فائرنگ کے نتیجے میں ڈپٹی کمشنر جاوید اللہ محسود، ایف سی اور پولیس کے 2 اہلکار اور 3 راہ گیر زخمی ہوگئے تھے۔
لوئر کرم میں نا معلوم ملزمان کی جانب سے پولیس اور ایف سی پر حملہ کیا گیا جس سے علاقے میں سڑکیں بحال کروانے کے لیے جانے والے ضلعی انتظامیہ کے سربراہ ڈپٹی کمشنر جاوید اللہ محسود بھی زخمی ہوگئے، جنہیں تحصیل علی زئی ہسپتال منتقل کر دیا گیا۔
واقعے کے بعد بگن کے علاقے میں مزید نفری طلب کرکے علاقے کا محاصرہ کیا گیا تھا۔
لائیو ٹی وی