نیلم منیر کی شادی کی تقریبات کا آغاز
معروف ماڈل و اداکارہ نیلم کی شادی کی تقریبات کا آغاز ہوگیا، اداکارہ نے خود شادی کی تقریبات کی ویڈیوز اور تصاویر شیئر کردیں۔
نیلم منیر نے اپنے مایوں کی تقریبات کی ویڈیوز اور تصاویر شیئر کرتے ہوئے تصدیق کی کہ ان کی شادی کی تقریبات کا باضابطہ آغاز ہوگیا۔
اداکارہ نے دو جنوری کی شام کو مایوں کی تصاویر اور ویڈیوز شیئر کیں جو دیکھتے ہی دیکھتے وائرل ہوگئیں۔
مایوں کی ویڈیوز اور تصاویر میں اداکارہ کو روایتی پیلے لباس میں دیکھا گیا۔
گزشتہ کئی ہفتوں سے خبریں جاری تھیں کہ نیلم منیر 2024 کے اختتام پر شادی کے بندھن میں بندھ جائیں گی۔
دلچسپ بات یہ ہے کہ حال ہی میں نیلم منیر نے ایک پوڈکاسٹ کے دوران فی الحال شادی نہ کرنے کی تصدیق کی تھی اور کہا تھا کہ ایسا کوئی منصوبہ نہیں۔
انٹرویو کے بعد اب نیلم منیر کی شادی کی تقریبات کا آغاز ہوگیا اور انہوں نے صوبہ سندھ کے دارالحکومت کراچی میں مایوں کے لیے کرائے گئے فوٹوشوٹ کی تصاویر بھی شیئر کیں۔
اطلاعات تھیں کہ نیلم منیر کی شادی کی تقریبات متحدہ عرب امارات (یو اے ای) کی ریاست دبئی میں ہوں گی، تاہم اداکارہ نے مایوں کی تقریب کا فوٹوشوٹ کراچی میں ہی کروایا۔
یہ واضح نہیں ہے کہ نیلم منیر کی شادی کی دیگر تقریبات کہاں ہوں گی اور ان کی شادی کی تقریبات کب تک چلیں گی، تاہم امکان ہے کہ ان کی تقریبات ایک ہفتے سے زائد وقت تک چلیں گی اور ممکنہ طور پر ان کی شادی کی بعض تقریبات دبئی میں ہوں گی۔
نیلم منیر کے شریک حیات سے متعلق بھی فوری طور پر کوئی معلومات سامنے نہیں آ سکی، تاہم میڈیا رپورٹس کے مطابق اداکارہ اہل خانہ کی پسند سے کاروباری شخص سے شادی کر رہی ہیں۔
لائیو ٹی وی