کراچی میں نئے سال کے موقع پر ٹریفک پلان جاری
کراچی ٹریفک پولیس نے شہر میں نئے سال کے موقع پر ٹریفک پلان جاری کر دیا۔
واضح رہے کہ کراچی میں 2 روز کے لیے دفعہ 144 نافذ کرنے کا نوٹی فکیشن پہلے ہی جاری کردیا گیا تھا، جو 31 دسمبر تا یکم جنوری 2025 تک نافذ العمل رہے گا۔
آج جاری کردہ ٹریفک ہدایات کے ساتھ کہا گیا ہے اپنے اصل شناختی دستاویزات اپنے پاس رکھیں، وضاحت کی گئی کہ انہیں دستاویزات دکھانے پر آگے جانے کی اجازت دی جائے گی۔
ٹریفک پلان کے مطابق کورنگی اور ایکسپریس وے سے جانے والے کورنگی روڈ، سن سیٹ بلیوارڈ، گزری پل، سعودی سگنل خیابانِ شمشیر اور میکڈونلڈز سی ویو روڈ استعمال کریں۔
اس میں کہا گیا ہے کہ جو لوگ نارتھ ناظم آباد، گلبرگ، لیاقت آباد، گلشن اقبال، اور نیو کراچی سے آنے والوں کو ایم اے جناح روڈ، گارڈن روڈ، زیب النسا روڈ، آواری لائٹ سگنل، سندھ کلب چوک، تین تلوار سے براستہ زم زم بلیوارڈ اور میکڈونلڈز سی ویو روڈ استعمال کرنا چاہیے۔
اسی طرح گڈاپ، بن قاسم، لانڈھی، کورنگی، شاہ فیصل، جمشید روڈ اور صدر سے آنے والے شارع فیصل، سندھ کلب چوک، تین تلوار، ریس کورس سگنل، چوہدری خلیق الزمان روڈ، گزری پل، خیابان شمشیر اور میکڈونلڈ سی ویو کا راستہ استعمال کرسکتے ہیں۔
دریں اثنا، جناح پل کو مائی کولاچی کے راستے بوٹ بیسن، بلاول ہاؤس چورنگی، اور میرین روڈ (ہائپر اسٹار) سے میکڈونلڈز سی ویو کی طرف ٹریفک کے لیے کھولا جائے گا۔
ٹریفک پلان کے مطابق یہ سڑکیں ٹریفک کے لیے بند رہیں گی، پی آئی ڈی سی چوک (ضیا الدین روڈ) سے ضیا الدین پل لکی سگنل کی طرف، پی آئی ڈی سی چوک سے کلب روڈ، بلاول چورنگی سے بحریہ انڈر پاس، دو تلوار سے عبداللہ شاہ غازی کا مزار، عبداللہ شاہ غازی کے مزار سے 26ویں اسٹریٹ۔
ہدایات میں کہا گیا ہے کہ ماڑی پور روڈ سے جناح پل اور مائی کولاچی کی طرف بھاری ٹریفک (ٹینکرز، ڈمپر اور ٹرکوں) کو جانے کی اجازت نہیں ہوگی، مزید بتایا گیا کہ یہ حب ریور روڈ یا شارع پاکستان کے راستے جناح پل سے اپنی منزل تک جا سکیں گے۔
تاہم، ہلکی ٹریفک کو جناح پل اور ایم ٹی خان روڈ، پی آئی ڈی سی چوک سے شاہین چوک اور شارع فیصل کے راستے مائی کولاچی استعمال کرنے کی اجازت ہوگی۔
ٹریفک پلان میں کہا گیا ہے کہ شارع فیصل، عبداللہ ہارون روڈ، ڈاکٹر ضیا الدین احمد روڈ، مائی کولاچی روڈ، کورنگی روڈ اور ایم ٹی خان روڈ سمیت اہم سڑکوں پر پارکنگ کی اجازت نہیں ہوگی۔
مزید ہدایت کی گئی ہے کہ سائلنسر کے بغیر گاڑیوں اور موٹر سائیکلوں کے ساتھ ساتھ لاپرواہ ڈرائیوروں کے خلاف بھی کارروائی کی جائے گی۔
ادھر، کراچی پولیس چیف جاوید عالم اوڈھو نے خبردار کیا ہے کہ نئے سال کے موقع پر ہوائی فائرنگ کرنے والوں کے خلاف سخت کارروائی کی جائے گی تاکہ انسانی جانوں کو بچایا جاسکے۔
ان کا کہنا تھا کہ ہم ہوائی فائرنگ کرنے والوں کے خلاف قتل کی کوشش کا مقدمہ درج کرائیں گے۔
لائیو ٹی وی