قومی اسمبلی کو آگاہ کیا گیا ہے کہ ریاست مخالف سرگرمیوں پر 86 ہزار سمز بلاک کی گئی ہیں، پارلیمانی سیکریٹری نے ایوان میں سماجی رابطے کی ویب سائٹ ’ایکس‘ کو بلاک کرنے کا بھی اعتراف کرلیا۔

ڈان نیوز کے مطابق سوشل میڈیا پلیٹ فارمز پر فیک نیوز کے پھیلاؤ پر آسیہ ناز تنولی نے قومی اسمبلی میں توجہ دلاؤ نوٹس پیش کیا۔

پارلیمانی سیکریٹری نے توجہ دلاؤ نوٹس پر ایوان کو بتایا کہ ریاست مخالف سرگرمیوں پر 86 ہزار سمز بلاک کی گئی ہیں، پارلیمانی سیکریٹری نے سماجی رابطے کی ویب سائٹ ’ایکس‘ کو بلاک کرنے کا بھی اعتراف کرلیا۔

پارلیمانی سیکریٹری نے ایوان کو بتایا کہ الیکٹرانک کرائمز ایکٹ میں ترمیم بہت جلد کی جائے گی۔

سی پیک کے تحت پاکستان کو ملنے والی رقوم کی تفصیلات ایوان میں پیش

دریں اثنا وزارت پاکستان۔چین اقتصادی راہداری (سی پیک) کے تحت پاکستان کو ملنے والی رقوم کی تفصیلات قومی اسمبلی میں پیش کردی گئیں۔

وزارت منصوبہ بندی نے ایوان کو بتایا کہ سی پیک منصوبوں کے تحت اب تک 24 ارب 70 کروڑ ڈالر سے زائد رقم موصول ہوئی، اس رقم سے اب تک 43 منصوبے مکمل کیے جا چکے ہیں۔

سی پیک کے تحت بلوچستان اور خیبرپختونخوا میں 2،2 جبکہ پنجاب اور اسلام آباد میں ایک ایک منصوبہ تکمیل کے مراحل میں ہے۔

وزارت منصوبہ بندی نے مزید بتایا کہ پاک۔چین اقتصادی راہداری کے تحت اس وقت 70 کروڑ ڈالر سے زائد 8 منصوبے زیر تکمیل ہیں۔

ملک بھر کی جامعات کو 5 سال میں 301 ارب روپے جاری

ہائر ایجوکیشن کمیشن (ایچ ای سی) کی جانب سے ملک بھر کی یونیورسٹیوں کو دی جانے والی گرانٹس کی تفصیلات بھی قومی اسمبلی میں پیش کردی گئیں۔

وزارت تعلیم کی جانب سے ایوان کو آگاہ کیا گیا کہ ایچ ای سی نے گزشتہ 5 سالوں کے دوران 156 سرکاری جامعات کو 301 ارب 43 کروڑ روپے کی گرانٹ دی ہے۔

ایوان کو بتایا گیا ہے کہ وفاقی حکومت کے علاوہ صوبائی حکومتوں نے بھی اپنے صوبوں میں واقع یونیورسٹیز کو 26 ارب 60 کروڑ روپے کی گرانٹ دی ہے۔

وزارت تعلیم کے مطابق صوبائی حکومتوں نے کُل 63 جامعات کو گرانٹ دی ہیں جن میں پنجاب کی 22، سندھ کی 28، خیبرپختونخوا کی 5 اور بلوچستان کی 8 جامعات شامل ہیں۔

بعد ازاں قومی اسمبلی کا اجلاس جمعرات کی صبح 11 بجے تک ملتوی کردیا گیا۔