مشرقی روس 7.0 شدت کے زلزلے سے لرز اٹھا
علاقائی زلزلے کی نگرانی کرنے والی سروس نے کہا ہے کہ مشرقی روس کے جزیرہ نما کامچٹکا کے ساحل پر 7.0 کی شدت کا زلزلہ آیا ہے۔
خبر رساں ادارے ’اے ایف پی‘ کی رپورٹ کے مطابق مقامی ہنگامی صورتحال کی وزارت نے بتایا کہ زلزلے کے جھٹکے ساحل کے ساتھ ساتھ خطے کے دارالحکومت پیٹرو پاولوسک کامچٹسکی میں بھی محسوس کیے گئے۔
کامچٹکا کے علاقے میں روس کی ہنگامی وزارت کی علاقائی تنظیم نے ٹیلی گرام پر کہا کہ ریسکیورز اور فائر فائٹرز کی آپریشنل ٹیمیں عمارتوں کا معائنہ کر رہی ہیں۔
امریکا کے جیولوجیکل سروے نے رپورٹ کیا کہ زلزلہ مقامی وقت کے مطابق صبح 7:00 بجے کے بعد پیٹرو پاولوسک-کامچٹسکی سے 90 کلومیٹر مشرق میں تقریباً 50 کلومیٹر (30 میل) کی گہرائی میں آیا۔
امریکی قومی سونامی وارننگ سینٹر نے ابتدائی طور پر سونامی کا خطرہ جاری کیا تھا لیکن بعد میں یہ خطرہ ٹل گیا، تاہم مقامی حکام نے کوئی بھی سونامی الرٹ جاری نہیں کیا۔
روس کی یونیفائیڈ جیو فزیکل سروس کی کامچٹکا برانچ نے اپنی ویب سائٹ پر اطلاع دی کہ زلزلے کے بعد کئی آفٹر شاکس ریکارڈ کیے گئے لیکن ان کی شدت کم تھی۔
لائیو ٹی وی