راولپنڈی سے ورغلا کر اغوا کی گئیں 2 بچیاں کراچی سے بازیاب
پنجاب کے شہر راولپنڈی سے اغوا کی گئی 2 بچیوں کو کراچی سے بازیاب کرا لیا گیا۔
ڈان نیوز کی رپورٹ کے مطابق ڈپٹی انسپکٹر جنرل (ڈی آئی جی) ساؤتھ سید اسد رضا نے بتایا کہ بچیوں کو راولپنڈی کے علاقے غازیہ آباد سے اغوا کیا گیا تھا، 14 مئی کو کراچی ڈیفنس تھانے سے ایک بچی ملی جس کو ایک خاتون لے کر آئی تھی۔
ڈی آئی جی ساؤتھ نے مزید بتایا کہ کراچی پولیس نے بچی سے معلومات لیں تو اس نے بتایا کہ وہ غازیہ آباد راولپنڈی کی رہائشی ہے، اس سلسلے میں جب راولپنڈی پولیس سے رابطہ کیا تو معلوم ہوا کہ 2 بچیوں کے اغوا کی ایف آئی آر غازی آباد تھانے میں 7 ماہ پہلے درج کی گئی تھی۔
انہوں نے بتایا کہ دوسری بچی کی معلومات لی گئی تو معلوم ہوا کہ وہ ایک پرائیویٹ شیلٹر ہوم میں ہے، دونوں بچیاں آپس میں کزن ہیں، دونوں کو ورغلا کر اغوا کیا گیا تھا۔
بچی کو لے کر آنے والی خاتون نے کراچی پولیس کو بتایا کہ وہ بچی کو گود لینا چاہتی ہے، پولیس بچیوں کو راولپنڈی پولیس اور ان کے والدین کے حوالے کر رہی ہے۔
لائیو ٹی وی