سونا مزید 2400 روپے مہنگا، قیمت نئی بُلند ترین سطح پر پہنچ گئی
ملک بھر میں سونے کی فی تولہ قیمت میں آج پھر بڑا اضافے کے بعد 2 لاکھ 49 ہزار700 روپے کی نئی بلند ترین سطح پر پہنچ گیا۔
ڈان نیوز کے مطابق فی تولہ سونا 2400 روپے مہنگا ہو کر 2 لاکھ 49 ہزار700 روپے کا ہو گیا۔
اسی طرح 10گرام سونےکی قیمت میں2057 روپے اضافے کے بعد 2 لاکھ 14 ہزار 77 روپے ہو گئی۔
واضح رہے کہ 9 اپریل کو ملک بھر میں سونے کی فی تولہ قیمت 1900 روپے کا بڑا اضافہ ہوا تھا، جس کے بعد فی تولہ قیمت 2 لاکھ 47 ہزار 600 روپےکی ریکارڈ سطح پر پہنچ گئی تھی، اسی طرح 10گرام سونا 1629 روپے مہنگا ہو کر سے 2 لاکھ 12 ہزار 277 روپے کا ہوگیا تھا۔
تاہم 13 اپریل کو ملک بھر میں فی تولہ سونا 1100 روپے تولہ سستا ہو کر 2 لاکھ 46 ہزار 500 روپے کا ہو گیا تھا۔
اس سے ایک روز قبل فی تولہ سونے کی قیمت 2 لاکھ 45 ہزار 700 روپے کی بلند ترین سطح پر پہنچ گئی تھی، جبکہ 10 گرام سونا 514 روپے مہنگا ہو کر 2 لاکھ 10 ہزار 648 روپے کا ہوگیا تھا۔
یاد رہے کہ 6 اپریل کو ملک بھر میں سونے کی فی تولہ قیمت 4 ہزار 900 روپے کے بڑے اضافے کے بعد 2 لاکھ 45 ہزار100 روپے بُلند ترین سطح پر پہنچ گئی تھی۔
صراف اور جیولرز ایسوسی ایشن کے صدر حاجی ہارون رشید چاند نے ڈان نیوز کو بتایا تھا کہ سونے کی قیمتیں ملکی تاریخ کی ریکارڈ سطح پر آگئی ہیں۔
ان کا کہنا تھا کہ عالمی مارکیٹ میں قیمتیں بڑھنے کے اثرات کی وجہ سے مقامی سطح پر نرخوں میں اضافہ ہو رہا ہے۔
واضح رہے کہ 10 مئی 2023 کو فی تولہ اور 10 گرام سونے کی قیمت بُلند ترین سطح 2 لاکھ 40 ہزار روپے اور 2 لاکھ 5 ہزار 761 روپے پر پہنچ گئی تھی۔
اُس دن میں سونے کی فی تولہ قیمت میں 9 ہزار 900 روپے اور 10 گرام کی قیمت میں 8 ہزار 487 روپے کا بُلند ترین اضافہ ریکارڈ کیا گیا تھا۔
لائیو ٹی وی