کراچی: سہراب گوٹھ میں شہری کو قتل کرنے والے ڈاکوؤں پر مشتعل ہجوم کا تشدد، دونوں ہلاک
کراچی کے علاقے سہراب گوٹھ میں شہری کو قتل کرنے والے دو ڈاکوؤں کو مشتعل ہجوم نے تشدد کا نشانہ بنایا جس سے دونوں ڈاکو ہلاک ہو گئے۔
سہراب گوٹھ پولیس کے ایس ایچ او گل بیگ نے بتایا کہ دو مسلح ڈاکوؤں نے مچھر کالونی کے قریب گنا منڈی میں دکان کے باہر بیٹھے شہریوں سے موبائل فون چھیننے کی کوشش کی، شہریوں نے مزاحمت کی تو ملزمان نے ان پر فائرنگ کردی جس کے نتیجے میں گل سعد نامی شہری جاں بحق جبکہ عبدالصمد اور عبدالجبار زخمی ہو گئے۔
ایس ایچ او نے بتایا کہ ملزمان نے جائے واردات سے فرار ہونے کی کوشش کی لیکن شہریوں نے فرار ہونے کی کوشش کرنے والے مشتبہ افراد کا پیچھا کر کے انہیں پکڑ کر تشدد کا نشانہ بنایا۔
انہوں نے کہا کہ شہریوں کے تشدد سے دونوں ڈاکو موقع پر ہی ہلاک ہو گئے جبکہ لاشوں اور زخمیوں کو عباسی شہید ہسپتال منتقل کردیا گیا۔
ایدھی ترجمان کے مطابق ڈاکوؤں کی فائرنگ سے ہلاک 22 سالہ سعد گل ایک دکاندار تھا جبکہ ہلاک ہونے والے دونوں ملزمان کی فوری طور پر شناخت نہیں ہو سکی۔
لائیو ٹی وی