خدیجہ شاہ نے اپنے خلاف منی لانڈرنگ کی انکوائری لاہور ہائیکورٹ میں چیلنج کردی
پی ٹی آئی کی کارکن اور مشہور فیشن ڈیزائنر خدیجہ شاہ نے اپنے خلاف وفاقی تحقیقاتی ادارے (ایف آئی اے) میں منی لانڈرنگ کی انکوائری کو لاہور ہائی کورٹ میں چیلنج کردیا۔
ایف آئی اے نے خدیجہ شاہ کے خلاف منی لانڈرنگ کی تحقیقات شروع کردی ہے جسے فیشن ڈیزائنر نے عدالت عالیہ میں چیلنج کردیا ہے۔
خدیجہ شاہ نے لاہور ہائی کورٹ میں درخواست اپنے وکیل سمیر کھوسہ ایڈووکیٹ کی وساطت سے دائر کی، جس میں ایف آئی اے اور دیگر کو فریق بنایا گیا ہے۔
درخواست میں مؤقف اختیار کیا گیا ہے کہ خدیجہ شاہ مختلف مقدمات میں گرفتار ہیں، انہیں ضمانت ملنے کے بعد ایک کے بعد ایک نئے مقدمے میں گرفتار کیا جاتا رہا ہے۔
درخواست میں کہا گیا ہے کہ ایف آئی اے نے منی لانڈرنگ کی انکوائری بدنیتی کی بنیاد پر شروع کی، ادارے نے منی لانڈرنگ کی انکوائری قانون کے برعکس شروع کی۔
خدیجہ شاہ نے عدالت سے استدعا کی ہے کہ وہ منی لانڈرنگ کی انکوائری غیر قانونی قرار دینے کا حکم دے۔
واضح رہے کہ یکم دسمبر کو ایک سرکاری ذرائع نے ڈان اخبار کو بتایا تھا کہ ایف آئی اے نے خدیجہ شاہ کے خلاف مشکوک بینک ٹرانزیکشن کی شکایت موصول ہونے پر ان کے خلاف منی لانڈرنگ مقدمے کی تحقیقات کا آغاز کر دیا ہے۔
ان کا مزید کہنا تھا کہ تحقیقاتی ایجنسی نے بینک سے ان کے اکاؤنٹس اور بیرون ملک ٹرانزیکشنز کے حوالے سے تفصیلات طلب کرلی ہیں۔
ذرائع نے بتایا کہ خدیجہ شاہ سے جیل میں ان ٹرانزیکشنز کے حوالے سے پوچھ گچھ کی جائے گی۔
لائیو ٹی وی