قوم 10 نومبر تک عام انتخابات کی پوری امید رکھے، خرم دستگیر
وفاقی وزیر توانائی خرم دستگیر نے 2023 میں انتخابات کی تصدیق کرتے ہوئے کہا ہے کہ پاکستانیوں کو 10 نومبر تک نئی حکومت کے لیے ووٹ ڈالنے کی امید رکھنی چاہیے۔
وفاقی وزیر توانائی خرم دستگیر نے یہ بیان ڈان نیوز انگلش کو دیے گئے انٹرویو کے دوران دیا۔
وزیر توانائی نے کہا کہ ہاں یہ انتخابات کا سال ہے، میں پوری طرح سے امید کرتا ہوں اور توقع ہے کہ اگر وزیر اعظم ایک یا دو دن پہلے قومی اسمبلی کو تحلیل کرنے کا انتخاب کریں،پاکستان کے عوام کو اپنی نئی حکومت میں ووٹ دینے کی پوری توقع کرنی چاہیے، 10 نومبر کو یا اس سے پہلے۔
ایک سوال کے جواب میں انہوں نے کہا کہ 12 اگست کو پارلیمنٹ خود ہی تحلیل ہو جائے گی۔
وزیر توانائی خرم دستگیر کا بیان حکمران مسلم لیگ (ن) کے رکن کی جانب سے ابھی تک آنے والے انتخابات کے لیے مضبوط ٹائم لائن کا واضح اشارہ ہے۔
خیال رہے کہ قبل از وقت عام انتخابات پاکستان تحریک انصاف (پی ٹی آئی) پی ٹی آئی کے چیئرمین عمران خان کا گزشتہ سال ان کی برطرفی کے بعد سے بنیادی مطالبہ رہا ہے۔
تاہم فی الحال انتخابات غیر یقینی صورتحال کا شکار ہیں جو کہ دوسری صورت میں 13 اگست 2023 کو مسلم لیگ (ن) کی زیرقیادت حکومت کی مدت پوری ہونے کے بعد آنے والے اکتوبر میں ہونے والے ہیں۔
چونکہ حکمران اتحاد آنے والے اکتوبر میں عام انتخابات کے انعقاد کے بارے میں فیصلہ نہیں کرسکا ہے، وزیر اطلاعات مریم اورنگزیب نے دو روز قبل کہا تھا کہ الیکشن کمیشن آف پاکستان (ای سی پی) کی جانب سے حکومت کی مدت پوری ہونے کی تاریخ دینے کے بعد انتخابات کرائے جائیں گے۔
مریم اورنگزیب نے کہا تھا کہ مسلم لیگ (ن) اور اس کی اتحادی جماعتوں نے کہا ہے کہ جب ای سی پی اگست میں موجودہ حکومت کی مدت پوری ہونے کی تاریخ دے گا تو ہم انتخابات کرائیں گے۔ الیکشن کی تاریخ دینا ای سی پی کی ذمہ داری ہے۔
اکتوبر میں عام انتخابات کے انعقاد کے حوالے سے مخلوط حکومت کے رہنماؤں کی جانب سے مختلف بیانات سامنے آئے ہیں۔
اسی طرح گزشتہ دنوں پیپلز پارٹی کے شریک چیئرپرسن آصف علی زرداری نے دوٹوک ریمارکس دیئے تھے کہ انتخابات صرف ان کی منظوری سے ہوں گے۔
جبکہ پاکستان ڈیموکریٹک موومنٹ (پی ڈی ایم) کے صدر اور جمعیت علمائے اسلام فضل کے سربراہ مولانا فضل الرحمٰن نے بھی اکتوبر میں انتخابات کے انعقاد پر شکوک کا اظہار کیا تھا۔
انہوں نے کہا تھا کہ ہم سیاسی لوگ ہیں جو انتخابات کے حق میں ہیں لیکن (اکتوبر میں) انتخابات کے بارے میں فیصلہ دیگر اتحادی جماعتوں کے ساتھ مشاورت سے کیا جائے گا۔
ادھر سابق گورنر اور پیپلز پارٹی کے سینئر رہنما مخدوم احمد محمود نے انتخابات میں تاخیر کا اشارہ دیتے ہوئے کہا تھا کہ موجودہ وفاقی حکومت کی مدت پوری ہونے کے بعد نگران سیٹ اپ کم از کم چھ ماہ تک طول پکڑ سکتا ہے اگر اس نے معاشی طور پر اچھی کارکردگی کا مظاہرہ کیا۔
پنجاب سے تعلق رکھنے والے مسلم لیگ (ن) کے ایک سینئر رہنما نے ڈان سے بات کرتے ہوئے اپنا نام ظاہر نہ کرنے کی شرط پر کہا تھا کہ ملک میں اکتوبر میں انتخابات کرانے کا ابھی تک کوئی فیصلہ نہیں کیا گیا۔
لائیو ٹی وی