تصاویر: ’بائپر جوائے‘ کا آج بھارت اور پاکستان کے ساحل سے ٹکرانے کا امکان
بحیرہ عرب میں موجود سمندری طوفان ’بائپر جوائے‘ آج 15 جون بروز جعمرات کو کسی وقت سندھ میں کیٹی بندر اور بھارتی گجرات کے درمیان خشکی سے ٹکرائے گا، تیز ہوائیں، بارش اور اونچی لہریں طوفان کے نزدیک آنے کی اطلاع دے رہی ہیں۔
بدھ کی رات 9 بج کر 30 منٹ کے قریب پاکستان کے محکمہ موسمیات کی طرف سے جاری کردہ تازہ ترین الرٹ میں کہا گیا کہ یہ طوفان کراچی کے جنوب مغرب میں تقریباً 310 کلومیٹر ، ٹھٹھہ سے 300 کلومیٹر اور کیٹی بندر سے 240 کلومیٹر فاصلے پر تھا۔
الرٹ میں کہا گیا کہ سطح پر 150سے 160 کلومیٹر فی گھنٹہ اور سسٹم سینٹر کے ارد گرد 180 کلومیٹر فی گھنٹہ کی رفتار سے ہوائیں چل رہی ہیں جب کہ سمندری حالات کے باعث سسٹم سینٹر کے ارد گرد زیادہ سے زیادہ لہروں کی اونچائی 30 فٹ ہے۔
وزیر اعلیٰ سندھ کی جانب سے سے جاری کردہ معلومات کے مطابق 3 اضلاع میں مقیم 71 ہزار 380 کی کُل غیر محفوظ آبادی میں سے گزشتہ روز شام تک کُل 56 ہزار 985 افراد کو محفوظ مقام منتقل کردیا گیا۔
سرحد کے اس پار بھی صورتحال مختلف نہیں، بھارت کے محکمہ موسمیات نے کہا کہ ملک کے مغربی ساحلی علاقوں کی سڑکیں زیر آب آنے اور عارضی چھتوں والے مکانات کے تباہ ہونے کا خدشہ ہے۔
بھارتی حکام نے کہا کہ طوفان کے باعث جمعرات کو انتہائی تیز بارش متوقع ہے، کچھ اضلاع میں جمعرات کو 200 ملی میٹر سے زیادہ بارش ہو سکتی ہے، ساحلی ریاست گجرات کے آٹھ اضلاع کے متاثر ہونے کا خدشہ ہے، ہم اب تک 45 ہزار سے زیادہ لوگوں کو نکال چکے ہیں، انخلا کی کارروائیائی شام تک جاری رہیں گی۔
