سوشل میڈیا کی بندش: پاکستانیوں نے ’وی پی این‘ کے ذریعے حل نکال لیا، میمز کی بھرمار

ٹیک ڈیسک شائع May 11, 2023

سابق وزیراعظم عمران خان کی گرفتاری کے بعد ملک بھر میں ہونے والے مظاہروں کے درمیان دو روز سے سوشل میڈیا پلیٹ فارمز بلاک ہیں تاہم بیشتر پاکستانیوں نے اس کا حل وی پی این کے ذریعے نکال لیا جس کے بعد ٹوئٹر پر میمز کی بھرمار ہوگئی۔

یاد رہے کہ پاکستان تحریک انصاف (پی ٹی آئی) کے چیئرمین اور سابق وزیر اعظم پاکستان عمران خان اس وقت قومی احتساب بیورو (نیب) کی حراست میں ہیں اور انہیں عدالت نے 8 روز کے جسمانی ریمانڈ پر نیب کے حوالے کیا ہے۔

عمران خان کی گرفتاری کے دو گھنٹے بعد ہی ملک بھر میں پُرتشدد مظاہرے اور احتجاج شروع ہوگئے تھے، جس وجہ سے مقامی انتظامیہ نے متعدد شہروں میں دفعہ 144 نافذ کی تھی۔

اسی دوران وزارت داخلہ کی ہدایت پر پاکستان ٹیلی کمیونیکیشن اتھارٹی (پی ٹی اے) نے موبائل براڈ بینڈ سروسز، اور سوشل میڈیا پلیٹ فارمز کو بھی بلاک کر دیا تھا، پی ٹی اے کاکہنا تھا کہ انٹرنیٹ بندش غیر معینہ مدت کے لیے ہے۔

تاہم شہریوں نے اس کا بھی حل نکال لیا، بیشتر لوگوں نے وی پی این کے ذریعے سوشل میڈیا پلیٹ فارمز کو استعمال کرنا شروع کیا جس کے یکے بعد دیگرے سوشل میڈیا بالخصوص ٹوئٹر پر میمز کا طوفان آگیا۔

خیال رہے کہ وی پی این کے معنی ورچوئل پرائیویٹ نیٹ ورکس ہے جسے انسٹال کرکے آپ سوشل میڈیا پلیٹ فارم استعمال کرسکتے ہیں لیکن شرط یہ ہے کہ اس کے لیے آپ کے موبائل میں انٹرنیٹ سروس موجود ہو۔