بارشوں سے کراچی میں نظام زندگی درہم برہم
ملک بھر میں جاری مون سون کے تیسرے اسپیل نے سندھ اور بلوچستان میں تباہی مچادی ہے، کچی آبادیوں اور دیہاتوں میں سیکڑوں گھر پانی میں ڈوب چکے ہیں جبکہ اس وقت تک 18 شہری برسات سے متعلق مختلف واقعات میں جاں بحق ہوگئے ہیں۔
سندھ کے مختلف شہروں میں موسلادھار بارش نے لوگوں کی زندگی مفلوج بنا دی ہے، دادو، جوہی، جامشورو، ٹنڈو آدم، تھر، کاچھو سمیت مختلف علاقوں میں بارش کے پانی نے نظام زندگی کو تہس نہس کردیا ہے۔
سندھ کے دارالحکومت کراچی میں مسلسل جاری رہنے والی مون سون بارش نے شہریوں کو تکلیف میں مبتلا کر دیا ہے۔
کراچی کے علاقے لیاری، ملیر، گڈاپ، ناظم آباد، لالو کھیت، صدر، گارڈن اور ڈیفنس سمیت مختلف علاقے زیر آب آچکے ہیں جبکہ سڑکوں پر موجود پانی نے ٹریفک نظام کو شدید متاثر کیا ہے۔
