ممکن ہے آمنہ الیاس کو شادی کی پیشکش کروں تو انہیں کوئی اور رشتہ بھیج دے، نبیل گبول
پاکستان پیپلز پارٹی (پی پی پی) کے رہنما اور سینیئر سیاستدان نبیل گبول نے کہا ہے کہ یہ عین ممکن ہے کہ وہ آمنہ الیاس کو شادی کی پیش کش کریں تو اداکارہ کو کوئی اور رشتہ بھیج دے۔
نبیل گبول اور آمنہ الیاس جیو نیوز کے پروگرام ’جشن کرکٹ‘ میں شریک ہوئے، جہاں دونوں نے مختلف سیگمنٹ میں حصہ لیا اور سوالوں کے جوابات دیے۔
سوالوں کے جوابات دیتے ہوئے نبیل گبول نے کہا کہ نواز شریف کو غلط فیصلے پر نکالا گیا جب کہ شہباز شریف بہترین اداکار ہیں اور مریم نواز سے بلاول بھٹو بہترین سیاستدان ہیں۔
مذکورہ سیگمنٹ کے دوران نبیل گبول نے اعتراف کیا کہ متحدہ قومی موومنٹ (ایم کیو ایم) پاکستان میں شمولیت کرنا ان کا غلط فیصلہ تھا جب کہ یہ بھی اعتراف کیا کہ کراچی کے علاقے عزیز آباد سے رکن قومی اسمبلی کی نشت پر ان کی جیت جعلی تھی، ایم کیو ایم نے ٹھپے لگا کر انہیں جتوایا۔
اسی پروگرام میں آمنہ الیاس نے سوالوں کے جوابات دیتے ہوئے اعتراف کیا کہ شوبز انڈسٹری میں اقربا پروری موجود ہے جب کہ اب آہستہ آہستہ کامیاب ہیروئن کے لیے گوری رنگت کی شرط ختم ہوتی جا رہی ہے۔
اداکارہ نے بھی ایک سوال کے جواب میں بتایا کہ بلال بھٹو مسلم لیگ (ن) کی نائب صدر مریم نواز سے اچھے سیاستدان ہیں جب کہ انہوں نے عمران خان سمیت تمام سیاستدانوں کو کرپٹ بھی قرار دیا۔
اسی پروگرام میں میزبان نے نبیل گبول کو یاد دلایا کہ انہوں نے کچھ سال قبل جیو کے ایک پروگرام میں ریحام خان کو شادی کی پیش کش کی تھی، جس کے فوری بعد انہوں نے وزیر اعظم عمران خان سے شادی کرلی تھی۔
اب وہ ایک بار پھر پروگرام میں شادی کی ذو معنی باتیں کر رہے ہیں، اس کا کیا مطلب ہوا؟
میزبان کے سوال پر نبیل گبول نے ہنستے ہوئے آمنہ الیاس سے پوچھا کہ انہیں فرسٹ لیڈی بننا ہے یا پھر انہیں کسی بڑے عہدے پر جانا ہے؟ جس پر اداکارہ نے کوئی جواب نہیں دیا اور وہ مسکراتی رہیں۔
نبیل گبول نے دعویٰ کیا کہ انہیں معلوم ہے کہ اگلا وزیر اعظم کون ہوگا؟
اسی بحث کے دوران نبیل گبول نے آمنہ الیاس کو مخاطب ہوتے ہوئے کہا کہ یہ عین ممکن ہے کہ اگر وہ انہیں شادی کی پیش کش کریں تو کوئی اور اداکارہ کو پیش کش کرکے انہیں بیاہ کر لے جائے۔
انہوں نے ماضی میں ریحام خان کو شادی کی پیش کش کو مثال کے طور پر پیش کیا اور کہا کہ ممکن ہے کہ اس بار آمنہ الیاس کے ساتھ ایسا ہو۔
نبیل گبول کے جواب پر اداکارہ نے مسکراتے ہوئے کہا کہ سیاستدان نے سوشل سروس کھول رکھی ہے۔
اسی پروگرام میں نبیل گبول نے یہ بھی کہا کہ بلاول بھٹو زرداری پہلے شادی کریں گے، اس کے بعد وہ وزیر اعظم بنیں گے۔
لائیو ٹی وی