پاکستان کی ٹی20 ورلڈ کپ میں لگاتار تیسری فتح
پاکستان نے ٹی20 ورلڈ کپ میں لگاتار تیسری فتح حاصل کرتے ہوئے افغانستان کو سنسنی خیز مقابلے کے بعد 5 وکٹوں سے شکست دے دی۔
افغانستان نے ٹاس جیت کر پہلے بیٹنگ کرتے ہوئے 76 رنز پر 6 وکٹیں گرنے کے باوجود 147 رنز بنائے، محمد نبی اور گلبدین نائب نے 35، 35 رنز کی اننگز کھیلتے ہوئے 71رنز کی شراکت قائم کی۔
ہدف کے تعاقب میں پاکستان کی جانب سے کپتان بابر اعظم نے نصف سنچری اسکور کی لیکن ایک مرحلے پر ٹیم کو دو اوورز میں فتح کے لیے 24رنز درکار تھے۔
اس موقع پر آصف علی نے جارحانہ بیٹنگ کرتے ہوئے ایک ہی اوور میں 4 چھکے لگا کر پاکستان کو فتح سے ہمکنار کرا دیا۔
