عمر شریف کی میت کل شام تک کراچی پہنچنے کا امکان
کامیڈی کے بے تاج بادشاہ عمر شریف کی میت کل 6 اکتوبر بروز بدھ کی شام تک یورپی ملک جرمنی سے وطن پہنچنے کا امکان ہے۔
عمر شریف 2 اکتوبر کی دو پہر کو جرمنی کے شہر نیونبرگ کے ہسپتال میں دوران علاج زندگی کی بازی ہار گئے تھے۔
انہیں 28 ستمبر کو کراچی سے ایئر ایمبولینس کے ذریعے امریکا منتقل کیا جا رہا تھا کہ ان کی طبیعت جرمنی میں بگڑ گئی، جس کے بعد انہیں وہاں ہسپتال میں داخل کرایا گیا تھا۔
عمر شریف کا جسد خاکی دو دن تک نیونبرگ کے ہسپتال میں تھا اور 4 اکتوبر کو وہاں کی مقامی انتظامیہ نے ان کا ڈیتھ سرٹیفکیٹ جاری کیا تھا، جس کے بعد ان کی میت کو پاکستانی سفارت خانے کے عملے اور ورثا کے حوالے کیا گیا تھا۔
یہ بھی پڑھیں: جرمنی میں عمر شریف کی نماز جنازہ ادا، میت ورثا کے حوالے کردی گئی
گزشتہ روز عمر شریف کی نیونبرگ میں نماز جنازہ بھی ادا کی گئی تھی اور یہ پہلے ہی خیال کیا جا رہا تھا کہ ان کی میت 6 اکتوبر کی شام تک وطن پہنچے گی۔
’جیو نیوز‘ کے مطابق عمر شریف کی میت کو آج نیونبرگ سے میونخ منتقل کیا جائے گا، جہاں سے ان کا جسد خاکی ترکی کے شہر استنبول لے جایا جائے گا۔
رپورٹ میں بتایا گیا کہ عمر شریف کی میت کل صبح کے وقت استنبول سے ترکش ایئر لائن کے ذریعے کراچی روانہ کی جائے گی اور ممکنہ طور پر ان کا جسد خاکی سہ پہر یا شام تک وطن پہنچ جائے گا۔
استنبول سے کراچی تک کا فضائی سفر سوا پانچ گھنٹے پر محیط ہے لیکن اس میں بعض اوقات زیادہ وقت بھی لگتا ہے۔
رپورٹ کے مطابق عمر شریف کی میت کے وطن پہنچنے کے حوالے سے سول ایوی ایشن (سی اے اے) نے انتظامات کو حتمی شکل دے دی۔
مزید پڑھیں: عمر شریف کی میت 2 دن میں پاکستان آنے کا امکان
رپورٹ میں مزید بتایا گیا کہ عمر شریف کی میت کو کراچی ایئرپورٹ سے ایدھی ایمبولینس کے ذریعے سرد خانے منتقل کیا جائے گا جب کہ ان کی تدفین عبداللہ شاہ غازی کے مزار کے احاطے میں کی جائے گی۔
خیال کیا جا رہا ہے کہ عمر شریف کی نماز جنازہ 7 اکتوبر بروز جمعرات ادا کی جائے گی لیکن اگر ان کی میت جلد وطن پہنچ گئی تو 6 اکتوبر کی رات تک ان کی تدفین کردی جائے گی۔
دوسری جانب میزبان وسیم بادامی نے اپنی ایک ٹوئٹ میں بتایا کہ عمر شریف کی نماز جنازہ مولانا بشیر فاروقی صاحب بدھ کو دوپہر تین بجے ان کے نام سے منسوب عمر شریف پارک (کلفٹن بلاک 2) میں پڑھائیں گے۔
تاہم اس سے قبل اداکار کی بیوہ زرین غزل نے بتایا تھا کہ عمر شریف کی نماز جنازہ مفتی تقی عثمانی پڑھائیں گے اور انہوں نے مذکورہ فرض سر انجام دینے کا وعدہ بھی کیا ہے۔
لائیو ٹی وی