عالمی برانڈ کی پاکستانی قمیض کی کاپی کی قیمت ساڑھے 5 لاکھ روپے
اسپورٹس و فیشن کے شہرہ آفاق اٹالین لگژری برانڈ 'گچی' یا 'گوچی' نے پاکستانی و بھارتی خواتین کی قمیض یا کرتے سے ملتی جلتی شرٹ کو ساڑھے پانچ لاکھ روپے کی قیمت تک فروخت کے لیے پیش کردیا۔
'گچی' یا 'گوچی' کو دیدہ زیب اور مہنگے لباس و جوتے سمیت دیگر فیشن ایبل چیزیں متعارف کرانے کی وجہ سے پہنچانا جاتا تھا۔
تاہم اس بار برانڈ کی جانب سے کڑاہی کی ہوئی خواتین کی شرٹ کو ساڑھے تین ہزار امریکی ڈالر کی رقم میں فروخت کے لیے پیش کیے جانے پر لوگ حیران رہ گئے۔
فیشن برانڈ نے خواتین کی جس ٹی شرٹ کو ساڑھےتین ہزار امریکی ڈالر میں فروخت کے لیے پیش کیا ہے، اس پر یورپی ملک یوکرین سمیت دیگر ممالک میں کی جانے والی کڑاہی کی گئی ہے۔
مذکورہ شرٹ جنوبی ایشیائی ممالک اور خاص طور پر پاکستان اور ہندوستان میں خواتین کی قمیض یا کرتے سے نہ صرف ملتی جلتی ہے بلکہ لوگ اسے پاکستانی قمیض کی کاپی بھی قرار دے رہےہیں۔
یہ بھی پڑھیں: فیشن برانڈ پر تشہیر کے ذریعے نسلی تعصب پھیلانے کا الزام
'گچی' یا 'گوچی' کی جانب سے صرف ایک شرٹ کو ساڑھے تین ہزار امریکی ڈالر یعنی پاکستانی 5 لاکھ 40 ہزار روپے کی قیمت میں فروخت کے لیے پیش کیے جانے پر حیران رہ گئے۔
فیشن برانڈ کی جانب سے متعارف کرائی گئی شرٹ کو دور جدید کے فیشن کے برعکس بھی قرار دیا گیا اور کہا گیا کہ مذکورہ طرز کی شرٹس اب کم ہی پہنی جاتی ہیں۔
تاہم زیادہ تر لوگوں نے فیشن برانڈز کو شرٹ کی قیمت پر تنقید کا نشانہ بنایا اور کچھ لوگوں نے کہا کہ پاکستان میں تو پورے کا پورا جوڑا وہ بھی دوپٹے کے ساتھ ڈھائی سے تین ہزار روپے کا ملتا ہے۔
یہ پہلا موقع نہیں ہے کہ کسی بڑے برانڈ کی جانب سے اتنی زیادہ قیمت پر لباس کو فروخت کے لیے پیش کیا گیا ہو۔
مزید پڑھیں: فیشن برانڈ پر چینی خواتین کو بدصورت دکھانے کا الزام
اس سے قبل رواں برس مارچ میں فیشن برانڈ ’زارا‘ نے بھی پاکستانی قمیض سے ملتی جلتی قمیض کو 20 ہزار روپے کی قیمت تک فروخت کے لیے پیش کیا تھا۔
’زارا‘ سے قبل امریکی فیشن ہاؤس ’سی‘ نے اپریل 2019 میں سندھی اجرک کی کاپی کرکے بنائے گئے خواتین کے لباس کو بھی مہنگی قیمت میں فروخت کے لیے پیش کیا تھا۔
فیشن ہاؤس ’سی‘ نے اجرک سے مشابہہ کپڑے سے تیار کردہ خواتین کی شرٹ 47 ہزار روپے میں فروخت کے لیے پیش کی تھی۔
فیشن ہاؤس ’سیُ سے پہلے مارچ 2019 میں معروف فرنچ فیشن ڈیزائنر کرسٹین لوبوٹن نے پشاوری چپلوں کی نقل کو ’رابرٹ‘ شوز کے نام سے جوتوں کو 65 ہزار روپے تک کی قیمت میں فروخت کے لیے پیش کیا تھا۔
لائیو ٹی وی