آکسیجن گیس، سلنڈرز پر سیلز ٹیکس کی چھوٹ دے دی گئی
وفاقی ریونیو بورڈ (ایف بی آر) نے آکسیجن گیس (O2) اور سلنڈرز کی درآمد پر مکمل سیلز ٹیکس کی چھوٹ دے دی۔
ڈان اخبار کی رپورٹ کے مطابق اس چھوٹ کا اطلاق 14 مئی سے 180 روز کے لیے ہوگا۔
یہ استثنیٰ آکسیجن گیس، O2 سلنڈرز، کرائیوجینک ٹینکس اور آکسیجن کانسنٹریٹرز/جنریٹرز/مینوفیکچرنگ پر ہوگا۔
2021 کے انکم ٹیکس نوٹی فکیشن SRO589 کے ذریعے ان اشیا کی درآمد پر انکم ٹیکس کی بھی چھوٹ ہوگی۔
اسی طرح کسٹمز کے نوٹی فکیشن کے ذریعے ان تمام اشیا پر کسٹم ڈیوٹی بھی ختم کردی گئی ہے۔
یہ بھی پڑھیں: ہنگامی صورتحال سے نمٹنے کیلئے مناسب آکسیجن و اسٹاک موجود نہیں، شبلی فراز
واضح رہے کہ کورونا وائرس کی تیسری لہر کے دوران پاکستان میں آکسیجن گیس کی طلب میں کئی گناہ اضافہ ہوگیا ہے۔
اس سلسلے میں مقامی سطح پر بھی آکسیجن گیس کی پیداوار اضافہ کیا گیا ہے جبکہ اسے درآمد کرنے کی بھی اجازت دی گئی ہے۔
گزشتہ ماہ وفاقی وزیر سائنس و ٹیکنالوجی سینیٹر شبلی فراز نے کہا تھا کہ کووڈ-19 کے حوالے سے کسی بھی ہنگامی صورتحال سے نمٹنے کے لیے ہمارے پاس مناسب آکسیجن اور دیگر ضروری اسٹاک موجود نہیں ہے۔
لائیو ٹی وی