ایک سال بعد پاکستان میں فیشن ویک کا اہتمام
کورونا کی وبا کے باعث پاکستان میں گزشتہ برس مارچ کے بعد کوئی بھی بڑی شوبز، فیشن یا موسیقی کی تقریب نہیں ہوئی اور اگر گزشتہ ایک سال کے دوران کسی ایوارڈ یا فیشن کی تقریب منعقد بھی کی گئی تو اسے ورچوئل منعقد کیا گیا۔
تاہم رواں ماہ کم از کم ایک سال بعد ملک میں پہلے فیشن ویک کا اہتمام کیا گیا، جس میں نہ صرف ماڈلز نے ریمپ پر واک کی بلکہ اس میں گلوکاروں نے اپنی آواز کا جادو بھی جگایا۔
پنجاب کے دارالحکومت لاہور میں نجی ٹی وی 'ہم ٹی وی' کی جانب سے تین روزہ برائیڈل شو کا آغاز 4 فروری کو کیا گیا۔
چار سے 6 فروری تک جاری رہنے والے برائیڈل فیشن ویک میں خصوصی طور پر برائیڈل کوچیور یعنی عروسی لباسوں کو پیش کیا گیا۔
فیشن ویک کے اختتام پر موسیقی کا اہتمام بھی کیا گیا اور گلوکار عارف لوہار، اذان سمیع خان سمیت دیگر گلوکاروں نے اپنی آواز کا جادو جگایا۔
برائیڈل کوچیور (عروسی لباس) کے فیشن ویک کے پہلے ہی دن علی ذیشان برانڈ کی جانب سے نئے تیار کردہ لباس ’نمائش‘ کو پیش کیا گیا اور ساتھ ہی علی ذیشان کی جانب سے فیشن ویک میں ’جہیز خوری‘ کی حوصلہ شکنی بھی کی گئی۔
علی ذیشان برانڈ نے ’نمائش‘ لباس کو یو این ویمن سمیت دیگر اداروں کے تعاون سے ’جہیز خوری‘ کے خلاف مہم کے لیے بھی استعمال کیا ہے اور علی ذیشان نے اس ضمن میں ایک مختصر ویڈیو بھی جاری کی۔
برائیڈل فیشن ویک میں زینب چھوٹانی، علی ذیشان، زہا کوچیور، نسا حسین، احسنز اور عائشہ و عثمان سمیت دیگر فیشن ڈیزائنرز و ہاؤسز نے بھی اپنی مصنوعات پیش کیں۔
تین روزہ فیشن ویک میں وزیر اطلاعات شبلی فراز اور فواد چوہدری سمیت دیگر شخصیات نے بھی شرکت کی جب کہ کورونا کی وجہ سے محدود شائقین کو فیشن ویک کے جلوے دیکھنے کی اجازت تھی۔
تمام تصاویر: برائیڈل کوچیور ویک فیس بک
