بختاور بھٹو اور محمود چوہدری کی نئی زندگی کا آغاز
سابق صدر آصف علی زرداری کی بڑی صاحبزادی 31 سالہ بختاور بھٹو زرداری 33 سالہ صنعت کار محمود چوہدری سے رشتہ ازدواج سے منسلک ہوگئیں اور ان کی رخصتی کی تقریب بھی بلاول ہاؤس میں منعقد ہوئی۔
بختاور بھٹو زرداری کا نکاح 29 جنوری کی شب کو ہوا تھا، ان کا نکاح ٹھٹہ کے عالم دین غلام محمد سہو نے پڑھایا تھا اور اس دوران بختاور کے بھائی بلاول اور والد آصف علی زرداری بھی موجود تھے۔
نکاح کے بعد ہی بلاول بھٹو نے بہن کی تصاویر شیئر کرتے ہوئے جذباتی پیغام لکھا تھا کہ آج انہیں ایسا محسوس ہو رہا ہے کہ والدہ انہیں دیکھ رہی ہیں۔
بلاول بھٹو زرداری نکاح کے بعد کی رسومات میں بھی بہن کے ساتھ دکھائی دیے تھے اور انہوں نے نہ صرف بڑے بھائی بلکہ والد اور والدہ کا کردار بھی ادا کیا۔
ذرائع کے مطابق بختاور بھٹو کو حق مہر میں 132 چاندی کے تولے دیے گئے، تاہم اس حوالے سے دونوں خاندانوں نے کوئی تفصیلات جاری نہیں کیں۔
اگرچہ بلاول بھٹو زرداری اور پیپلز پارٹی نے پہلے ہی واضح کیا تھا کہ 30 جنوری کو بختاور بھٹو کی رخصتی کی تقریب بھی بلاول ہاؤس میں ہوگی، جس میں 300 مہمان شرکت کریں گے۔
تاہم یہ نہیں بتایا گیا تھا کہ رخصتی کی تقریب کے بعد بختاور بھٹو زرداری کہاں جائیں گی؟
بعد ازاں بلاول بھٹو زرداری نے اس بات کی بھی تصدیق کی تھی کہ بختاور بھٹو کی شادی کی تقریبات لاڑکانہ، لاہور اور اسلام آباد میں بھی ہوں گی، تاہم یہ واضح نہیں کیا گیا تھا کہ ان تقریبات میں دلہا اور دلہن شریک ہوں گے یا نہیں؟
لیکن اب خبر سامنے آ رہی ہے بختاور بھٹو 30 جنوری کے بعد ممکنہ طور پر کراچی سے براہ راست لاہور رخصت ہوں، جہاں ان کے دلہا محمود چوہدری کے آبائی گھر کو سجایا گیا ہے۔
سما ٹی وی کے مطابق بختاور بھٹو زرداری کراچی سے لاہور رخصت ہوں گی، تاہم یہ کہنا قبل از وقت ہے کہ بختاور بھٹو لاہور کب روانہ ہوں گی۔
دوسری جانب ذرائع کے مطابق لاہور کے بعد بختاور بھٹو زرداری کی شادی کی تقریب اسلام آباد میں بھی منعقد ہوگی جب کہ بعد ازاں لاڑکانہ میں بھی ایک تقریب کا انعقاد کیا جائے گا۔
تاہم پیپلز پارٹی ذرائع کے مطابق بختاور بھٹو کی شادی کی تقریب پہلے لاڑکانہ میں منعقد ہو سکتی ہے، لیکن اس حوالے سے واضح طور پر بلاول بھٹو یا ان کے ترجمان کی جانب سے کوئی بیان جاری نہیں کیا گیا۔
خیال رہے کہ بختاور بھٹو کی شادی کی تقریبات ان کے 31 ویں جنم دن سے یعنی 25 جنوری سے شروع ہوئی تھیں اور تقریبات کا آغاز محفل میلاد سے کیا گیا تھا۔
بختاور بھٹو کی رسم حنا کی مرکزی تقریب 27 جنوری کو ہوئی تھی جبکہ 28 جنوری کو بھی سندھی و بلوچی رسومات کی تقریبات کا انعقاد کیا گیا۔
بختاور بھٹو کی شادی کی تقریبات میں مقامی فنکاروں کو مدعو کیا گیا تھا، جنہوں نے مہمانوں کو لوک پرفارمنس سے محظوظ کیا۔
نکاح کے موقع پر بختاور بھٹو نے نوجوان فیشن ڈیزائنر وردھا سلیم کا تیار کردہ لباس پہنا تھا، جو گولڈن اور پنک رنگوں کے امتزاج سے تیار کیا گیا تھا۔
