پاکستان میں 6 ماہ بعد ایس او پیز کے ساتھ تعلیمی ادارے کھل گئے
عالمی وبا کورونا وائرس کا پھیلاؤ روکنے کے لیے مارچ میں بند کیے گئے تعلیمی ادارے آج (15 ستمبر کو) 6 ماہ بعد مرحلہ وار کھول دیے گئے۔
آج سے اسکولز صرف نویں اور دسویں جماعت جبکہ کالجز اور جامعات میں تعلیمی سلسلہ بحال ہوگیا جبکہ سیکنڈری اور پرائمری جماعتوں کے طلبہ کے لیے بھی مرحلہ وار اسکولز کھولے جائیں گے۔
اس دوران کورونا وائرس کا پھیلاؤ روکنے کے لیے اسٹینڈرڈ آپریٹنگ پروسیجرز (ایس او پیز) پر عملدرآمد کو بھی یقینی بنانے کی کوشش کی گئی۔
ایس او پیز کے اہم نکات میں طلبہ کی تعداد میں کمی، کلاس رومز میں سماجی دوری کو یقینی بنانا، طلبہ اور اسکول کے عملے کا ماسک پہننا، اداروں میں ماسک کے بغیر داخل نہ ہونا وغیرہ شامل ہیں۔
