پاکستان اسٹاک ایکسچینج میں شدید مندی، کے ایس ای 100 انڈیکس 2200پوائنٹس کم ہوگیا
دنیا بھر میں پھیلنے والے کورونا وائرس سے جہاں عالمی اسٹاک مارکیٹ پر منفی اثرات پڑ رہے ہیں وہیں ملک میں اس وبا کے کیسز میں اضافے کے ساتھ ہی پاکستان اسٹاک ایکسچینج میں بھی مسلسل مندی دیکھی گئی اور آج کاروباری ہفتے کے تیسرے دن کے ایس ای 100 انڈیکس 2 ہزار 200 پوائنٹس کم ہونے کے بعد 30 ہزار 416 پوائنٹس پر بند ہوگیا۔
بدھ کو کاروباری دن کا آغاز ہوا تو گزشتہ کئی روز سے جاری مندی کے بادل مارکیٹ میں چھائے رہے اور مارکیٹ کھلنے کے تقریباً ایک گھنٹے بعد 1682 پوائنٹس کی کمی کے بعد کاروبار کو معطل کرنا پڑا۔
واضح رہے کہ یہ 2 ہفتوں میں پانچویں مرتبہ ہے کہ کے ایس ای 100 اور 30 انڈیکس میں شدید کمی کے باعث کاروبار کو 45 منٹ کے لیے معطل کرنا پڑا۔
مزید پڑھیں: اسٹیٹ بینک نے شرح سود 12.5 فیصد کردی
جس وقت کاروبار معطل کیا گیا اس وقت کے ایس ای 100 انڈیکس ایک ہزار 682 پوائنٹس کی کمی سے 30 ہزار 934 پوائنٹس پر آگیا تھا جبکہ کے ایس ای 30 انڈیکس 6.26 فیصد یعنی 895 پوائنٹس کم ہوگیا تھا۔
یہ مدنظر رہے کہ بورس رولز کے مطابق کے ایس ای 30 انڈیکس 4 فیصد یا اس سے زائد گر جائے اور 5 منٹ تک برقرار رہے تو کاروبار کو 45 منٹ کے لیے روک دیا جاتا ہے۔
بعد ازاں کاروبار کا آغاز ہوا تو مارکیٹ میں وہی مندی کا رجحان برقرار رہا اور ایک موقع پر کے ایس ای 100 انڈیکس 2 ہزار ایک سو 39 پوائنٹس تک گر گیا۔
تاہم وقت کے ساتھ ساتھ مندی کا یہ سلسلہ برقرار رہا اور مارکیٹ میں کاروبار کے اختتام تک کے ایس ای 100 انڈیکس 2 ہزار 200 پوائنٹس کم ہوکر 30 ہزار 416 پوائنٹس پر بند ہوگیا۔
خیال رہے کہ گزشتہ روز یعنی 17 مارچ کو بھی سرمایہ کاروں میں کورونا وائرس کے حوالے سے بے چینی کے باعث شدید مندی کا رجحان جاری رہا تھا اور ایک ہزار پوائنٹس کی کمی کے ساتھ کے ایس ای-100 انڈیکس 32 ہزار 650 پوائنٹس پر بند ہوا تھا۔
حالیہ مندی سے رواں برس تقریباً 20 فیصد کمی ریکارڈ ہوچکی ہے اور 13 جنوری کو حاصل ہونے والی بہترین سطح سے مزید 25 فیصد خسارہ ریکارڈ کیا جاچکا ہے۔
اگر رواں ہفتے کے آغاز کی بات کریں تو پیر کو کاروبار کا اختتام چار ماہ کی کم ترین سطح 2 ہزار 416 پوائنٹس کے ساتھ 33 ہزار 644 پوائنٹس پر ہوا تھا جبکہ اسی روز کے ایس ای 100 انڈیکس ایک ہزار 651 پوائنٹس گرنے پر کاروبار روکا گیا تھا۔
پیر کو دیکھی جانے والی شدید مندی کے باعث مارکیٹ سے 382 ارب روپے کی بھاری رقم صاف ہوگئی تھی۔
یہ بھی پڑھیں: کورونا وائرس کے باعث اسٹاک مارکیٹ میں مسلسل دوسرے روز بھی شدید مندی
یاد رہے کہ گزشتہ ہفتے کے آخری روز بھی پاکستان اسٹاک ایکسچینج میں ایک ہزار 682 پوائنٹس کی کمی کے بعد کاروبار کو روک دیا گیا تھا۔
اس سے قبل 12 مارچ کو بھی پاکستان اسٹاک ایکسچینج میں بھی شدید مندی کا رجحان دیکھا گیا تھا اور کے ایس ای 100 انڈیکس 4.53 فیصد یا ایک ہزار 707 پوائنٹس کی کمی پر بند ہوا تھا۔
علاوہ ازیں گزشتہ ہفتے کے آغاز یعنی 9 مارچ کو کاروبار شروع ہونے کے کچھ ہی دیر بعد کے ایس ای 100 انڈیکس 2 ہزار 302 پوائنٹس گر گیا تھا جس کے باعث مارکیٹ سے 184 ارب روپے کا بھاری سرمایہ صاف ہوگیا تھا۔
لائیو ٹی وی